<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 18th November 2026

એર ઇન્ડિયા વિમાન દુર્ઘટનાની તપાસ અંતિમ તબક્કામાં: કેન્દ્ર સરકારે સુપ્રીમ કોર્ટમાં માહિતી આપી કે અંતિમ અહેવાલ ટૂંક સમયમાં જાહેર થશે

અમદાવાદ વિમાન દુર્ઘટના મામલે સુપ્રીમ કોર્ટમાં સુનાવણી દરમિયાન સરકારે જણાવ્યું કે તપાસ આખરી ચરણમાં છે અને આંતરરાષ્ટ્રીય પ્રોટોકોલ મુજબ પ્રક્રિયા ચાલી રહી છે.

નવી દિલ્હી, તા.૧૮: જૂન ૨૦૨૫ દરમિયાન અમદાવાદથી લંડન જઈ રહેલા એર ઇન્ડિયાના વિમાન અકસ્માત મામલે બુધવારે સુપ્રીમ કોર્ટમાં સુનાવણી હાથ ધરવામાં આવી હતી, જેમાં કેન્દ્ર સરકારે સ્પષ્ટ કર્યું છે કે આ ગંભીર દુર્ઘટનાની સત્તાવાર તપાસ હાલ તેના અંતિમ ચરણમાં પહોંચી ગઈ છે.

 

મુખ્ય ન્યાયાધીશના નેતૃત્વ હેઠળની ખંડપીઠ સમક્ષ રજૂઆત કરતા સોલિસિટર જનરલે જણાવ્યું હતું કે એરલાઇન દુર્ઘટનાની તપાસ લગભગ પૂર્ણ થવાને આરે છે, પરંતુ આંતરરાષ્ટ્રીય ઉડ્ડયન નિયમો અને પ્રોટોકોલનું પાલન કરવાનું હોવાથી રિપોર્ટ સબમિટ કરવામાં થોડો સમય લાગી રહ્યો છે.

 

અગાઉ એરક્રાફ્ટ એક્સિડેન્ટ ઇન્વેસ્ટિગેશન બ્યુરો દ્વારા અદાલતને એવું જણાવવામાં આવ્યું હતું કે ઓક્ટોબર ૨૦૨૬ના પ્રથમ સપ્તાહ સુધીમાં આ અંતિમ અહેવાલ તૈયાર થઈ જશે, પરંતુ નિર્ધારિત સમયમસીમા વીતી જવા છતાં રિપોર્ટ સાર્વજનિક ન થવાને કારણે પક્ષકારો દ્વારા વહેલી સુનાવણીની માંગ કરવામાં આવી હતી.

 

અદાલતમાં દાખલ કરાયેલી આ અરજી વિમાનના દિવંગત કેપ્ટન સુમીત સભરવાલના પિતા પુષ્કર રાજ સભરવાલ દ્વારા સ્વતંત્ર અને નિષ્પક્ષ તપાસની માંગ સાથે કરવામાં આવી હતી, જેમાં તેમણે તપાસની પારદર્શિતા સામે કેટલાક સવાલો ઉઠાવ્યા હતા.

 

આ અકસ્માતની પ્રાથમિક તપાસમાં એવું સામે આવ્યું હતું કે ઉડ્ડયન ભર્યાના થોડીક જ ક્ષણોમાં વિમાનના એન્જિન ફ્યુઅલ-કંટ્રોલ સ્વિચ અચાનક 'રન'માંથી 'કટઓફ' સ્થિતિમાં જતા રહ્યા હતા, જેના કારણે બંને એન્જિનનો ઇંધણ પુરવઠો બંધ થઈ ગયો હતો, જોકે આ સ્વિચ કેમ ખસી તે સ્પષ્ટ થઈ શક્યું નહોતું.

 

આગામી સમયમાં કેન્દ્ર સરકાર દ્વારા આંતરરાષ્ટ્રીય સહયોગી દેશોની ટિપ્પણીઓ મેળવ્યા બાદ અંતિમ અહેવાલને આખરી સ્વરૂપ આપવામાં આવશે, જેનાથી આ દુર્ઘટના પાછળના વાસ્તવિક કારણો પર સત્તાવાર પડદો ખસશે તેવી પૂરી શક્યતા છે.

(5:10 PM IST)