ઉજ્જૈનઃતા.૧૭:  ઉજ્જૈનમાં ૪૫ વર્ષ જૂની ચોરીની વાત એક એઆઈ તસવીરના કારણે ફરી સામે આવી છે. વાત વર્ષ ૧૯૮૧ની છે. ત્‍યારે ઉજ્જૈનની એક નાની દાગીનાની દુકાનમાંથી સોનાનો હાર ચોરાયો હતો. આ ચોરીમાં એક મહિલા પર શંકા ગઈ હતી. ચોરી થયા પછી મહિલા અચાનક ગાયબ થઈ ગઈ હતી. પોલીસે તેને શોધવા ઘણી કોશિશ કરી હતી. પરંતુ લાંબા સમય સુધી તેની કોઈ ભાળ મળી નહોતી. મહિલાએ પોતાનું નામ બદલી નાખ્‍યું હતું. તેણે પોતાની ઓળખ પણ બદલી હતી. આ પછી તે નવી ઓળખ સાથે જીવન જીવવા લાગી હતી. વર્ષો પસાર થતા આ જૂની ચોરીની વાત પણ ધીમે ધીમે ભુલાઈ ગઈ હતી. લગભગ ૪૫ વર્ષ સુધી આ મામલામાં કોઈ નવી કડી મળી નહોતી. પરંતુ વર્ષ ૨૦૨૬માં બનેલી એક નાની ઘટનાએ આખી વાત બદલી નાખી હતી.

હાલમાં લોકો પોતાની જૂની ઉંમર જેવી તસવીરો બનાવવા માટે એઆઈનો ઉપયોગ કરી રહ્યા છે. આ માટે પોતાની આજની તસવીર આપીને જુના સમયનો દેખાવ તૈયાર કરવામાં આવે છે. આવી તસવીરો સોશિયલ મીડિયા પર પણ ઘણી જોવા મળી રહી છે. વર્ષો પહેલાં ચોરીના કેસમાં શંકાસ્‍પદ બનેલી મહિલાએ પણ આવી જ એક તસવીર બનાવી હતી. તેણે આ તસવીર માત્ર મજા માટે મૂકી હતી. પરંતુ આ તસવીર ક્‍યાં સુધી પહોંચશે તેની તેને ખબર નહોતી. આ તસવીર દાગીનાની દુકાનના જૂના માલિક સુધી પહોંચી ગઈ અને તેમને વર્ષો પહેલાંની એ યુવતીનો ચહેરો હજુ પણ યાદ હતો. તસવીરમાં દેખાતો ચહેરો જૂના ચહેરા સાથે મળતો આવતો હતો. આથી દુકાનના માલિકને શંકા ગઈ હતી. તેમણે તરત જ પોલીસને જૂની ચોરી વિશે જાણ કરી હતી. પોલીસે પણ આ વાતને ગંભીરતાથી લીધી હતી. જૂના કેસની વિગતો ફરી તપાસવામાં આવી હતી. ત્‍યાર બાદ પોલીસે મહિલાને શોધી કાઢી હતી.

પોલીસે મહિલાની પૂછપરછ કરી હતી. પૂછપરછ દરમિયાન તેણે ચોરી કરી હોવાની કબૂલાત કરી હોવાનું જાણવા મળ્‍યું છે. આ રીતે વર્ષોથી અટવાયેલો ચોરીનો મામલો ફરી સામે આવ્‍યો હતો.

આ આખી ઘટનામાં સૌથી ખાસ વાત એ છે કે મહિલાની ઓળખ કોઈ નવા પુરાવાથી સામે આવી નહોતી. ન કોઈ નવી તપાસ દરમિયાન તેની માહિતી મળી હતી અને ન તો કોઈ જૂના કેમેરાની તસવીરથી તેને શોધવામાં આવી હતી. એક સામાન્‍ય એઆઈ તસવીર જ આખા કેસની નવી કડી બની હતી. વર્ષો પહેલાં દુકાનના માલિકે જોયેલો ચહેરો તેમની યાદમાં રહી ગયો હતો. એ જ યાદે આ વખતે પોલીસને આગળ વધવામાં મદદ કરી હતી