લખનૌઃ ઉત્તર પ્રદેશ માં આગામી વિધાનસભા ચૂંટણીઓ પહેલાં બહુજન સમાજ પાર્ટી (BSP) માં મોટો રાજકીય ભૂકંપ આવ્યો છે. બસપા સુપ્રીમો માયાવતીએ (Mayawati) ફરી એકવાર કડક વલણ અપનાવીને પોતાના વેવાઈ (આકાશ આનંદના સસરા) અશોક સિદ્ધાર્થ ને પક્ષમાંથી બહારનો રસ્તો બતાવી દીધો છે. આ ઉપરાંત પક્ષના સિનિયર કોઓર્ડિનેટર રણધીર સિંહ બેનીવાલ ને પણ બસપામાંથી હાંકી કાઢવામાં આવ્યા છે.

પક્ષમાંથી હાંકી કાઢતાં પહેલાં માયાવતીએ અશોક સિદ્ધાર્થ પાસેથી દિલ્હી, કર્ણાટક, ઓડિશા અને પશ્ચિમ બંગાળ જેવા રાજ્યોનો પ્રભારી પદનો ચાર્જ (In-charge) પાછો ખેંચી લીધો હતો. જ્યારે રણધીર સિંહ બેનીવાલ પાસે પંજાબ, હિમાચલ પ્રદેશ અને જમ્મુ-કાશ્મીરની જવાબદારીઓ હતી. આ તમામ જવાબદારીઓમાંથી મુક્ત કર્યા બાદ સોશિયલ મીડિયા (Social Media) પર અધિકૃત પોસ્ટ જારી કરીને બંને નેતાઓને પક્ષમાંથી નિષ્કાસિત (Expelled) કરવાનો આદેશ જારી કરાયો છે.

પોતાના અધિકૃત સોશિયલ મીડિયા એકાઉન્ટ X પર એક લાંબી પોસ્ટ શેર કરીને માયાવતીએ પક્ષના કાર્યકરો અને જનતા સમક્ષ કેટલીક બાબતો સ્પષ્ટ કરી છે: માયાવતીએ સ્પષ્ટ કર્યું કે ઉત્તર પ્રદેશ ચૂંટણી માટે ઉમેદવારો નક્કી કરવાનો સંપૂર્ણ અધિકાર માત્ર તેમની પાસે છે. તેમણે લખનૌ કાર્યાલય ખાતે બેઠકો યોજીને બે ડઝનથી વધુ ઉમેદવારોના નામ ફાઇનલ કરી દીધા છે.

નેશનલ કન્વીનર આકાશ આનંદ અંગે ફેલાવવામાં આવતી અફવાઓ પર વિરામ મુકતા તેમણે કહ્યું કે, આકાશ આનંદ માત્ર પક્ષ દ્વારા નક્કી કરાયેલા ઉમેદવારોની જાહેરાત માટે જનસભાઓ યોજી રહ્યા છે. તેનો તેમના કદ વધારવા કે ઘટાડવા સાથે કોઈ લેવાદેવા નથી.

માયાવતીએ બસપાના કાર્યકરોને સોશિયલ મીડિયા પર આકાશ આનંદ અંગે ફેલાવવામાં આવતી વાતો અને અફવાઓથી દૂર રહેવા અને જાતિવાદી તત્વોથી સતર્ક રહેવા અપીલ કરી છે.

માયાવતીએ ઉમેર્યું કે તેઓ પોતે જ ઉમેદવારોના ઈન્ટરવ્યુ (Interviews) લઈને આખરી નિર્ણય લઈ રહ્યા છે. આકાશ આનંદ પક્ષના દિશા-નિર્દેશો મુજબ દેશભરમાં સંસ્થાકીય બેઠકો (Organizational Meetings) યોજી રહ્યા છે અને પોતાની જવાબદારી નિષ્ઠાપૂર્વક નિભાવી રહ્યા છે. પરંતુ ચૂંટણીના માહોલમાં પક્ષ વિરોધી પ્રવૃત્તિઓ કરનારા કે શિસ્તભંગ કરનારા નેતાઓ સામે બસપા કોઈ પણ બાંધછોડ કરવાના મૂડમાં નથી.