ન્યૂ યોર્ક: અમેરિકાના સૌથી મોટા અને આર્થિક રીતે સક્ષમ ગણાતા ન્યૂ યોર્ક શહેરમાંથી ટ્રાન્સપોર્ટ વ્યવસ્થાને હચમચાવી નાખતી એક ચિંતાજનક ઘટના સામે આવી છે. યુનાઇટેડ સ્ટેટ્સની સૌથી વ્યસ્ત પેસેન્જર રેલ સેવા ગણાતી લોંગ આઇલેન્ડ રેલ રોડ (LIRR) ના હજારો કર્મચારીઓ શનિવારે વહેલી સવારે અચાનક હડતાળ પર ઉતરી ગયા છે. છેલ્લા ૩૦ વર્ષથી વધુ સમયમાં આ રેલવે લાઇન પર પડેલી આ પહેલી સૌથી મોટી હડતાળ છે. કર્મચારીઓની આ આક્રમક હડતાળને કારણે અમેરિકાના આ આખા પ્રદેશની લાઈફલાઈન સમાન ગણાતી ટ્રેન સેવાઓ પળભરમાં ઠપ્પ થઈ ગઈ છે અને સમગ્ર ન્યૂ યોર્ક સ્ટેટમાં મુસાફરોની ભારે કટોકટી સર્જાઈ છે.

૩ વર્ષની વાટાઘાટો અને ૨ ફેડરલ હસ્તક્ષેપ છતાં સોદો નિષ્ફળ

આ કોઈ તાત્કાલિક ગુસ્સાનું પરિણામ નથી, પરંતુ રેલવે એડમિનિસ્ટ્રેશન અને મજૂર સંગઠનો વચ્ચે છેલ્લા ત્રણ વર્ષથી ચાલી રહેલી નિષ્ફળ કરાર વાટાઘાટોની પરાકાષ્ઠા છે. આ વિવાદને ઉકેલવા માટે અમેરિકન સરકાર દ્વારા બે વખત ફેડરલ હસ્તક્ષેપ (સરકારી મધ્યસ્થતા) પણ કરવામાં આવ્યો હતો. તેમ છતાં શનિવારે મધ્યરાત્રિએ મળેલી છેલ્લી ઘડીની સોદાબાજીમાં વહીવટી તંત્ર કર્મચારીઓની માંગણીઓ સંતોષવામાં નિષ્ફળ રહ્યું હતું. એન્જિનિયરો, સિગ્નલમેન અને મશીનિસ્ટ સહિતના ૩,૫૦૦ થી વધુ કુશળ કામદારોનું પ્રતિનિધિત્વ કરતા પાંચ મોટા યુનિયનોએ આખરે રેલવે ચલાવતી સરકારી એજન્સી, મેટ્રોપોલિટન ટ્રાન્સપોર્ટેશન ઓથોરિટી (MTA) સામે સીધો મોરચો માંડી દીધો છે.

પગાર વધારો અને હેલ્થકેર પર મડાગાંઠ

યુનિયનોમાંથી એક, બ્રધરહુડ ઓફ લોકોમોટિવ એન્જિનિયર્સ એન્ડ ટ્રેનમેનના ઉપપ્રમુખ કેવિન સેક્સટને અડધી રાત્રે એમટીએ (MTA) મુખ્યાલયની બહાર એક ઈમરજન્સી ન્યૂઝ કોન્ફરન્સ યોજીને આ હડતાળની જાહેરાત કરી હતી. તેમણે ભારે હૃદયે જણાવ્યું હતું કે, "અમને ખરેખર અફસોસ છે કે આપણે આજે આ ગંભીર પરિસ્થિતિમાં આવીને ઊભા છીએ, પરંતુ સત્તાવાળાઓ વર્ષ ૨૦૨૬ માં કર્મચારીઓ માટે વ્યાજબી પગાર વધારો અથવા યોગ્ય આરોગ્ય સંભાળ (હેલ્થકેર) વીમા યોગદાન જેવા પાયાના મુદ્દાઓ પર સહમત થઈ શક્યા નથી. આ આંદોલન મેનેજમેન્ટને એ સમજાવવા માટે છે કે તેમણે સામૂહિક સોદાબાજીને ગંભીરતાથી લેવી જ પડશે."

૨,૭૦,૦૦૦ દૈનિક મુસાફરો ભગવાન ભરોસે!

લોંગ આઇલેન્ડ રેલ રોડ (LIRR) ની ટ્રેનો બંધ થવાને કારણે ન્યૂ યોર્ક સિટી અને લોંગ આઇલેન્ડ વચ્ચે અપ-ડાઉન કરતા ૨,૭૦,૦૦૦ થી વધુ દૈનિક મુસાફરો રોડ પર આવી ગયા છે. આ એવો વિસ્તાર છે જ્યાં પ્રદેશના મોટાભાગના મધ્યમવર્ગીય કામદારો અને કર્મચારીઓ રહે છે અને નોકરી માટે ટ્રેન પર નિર્ભર છે. છેલ્લે ૧૯૯૪ માં આવી જ એક મોટી રેલવે હડતાળ થઈ હતી, જે માત્ર બે દિવસ ચાલી હતી પરંતુ આખું ન્યૂ યોર્ક જામ થઈ ગયું હતું. આ વખતે જો હડતાળ લાંબી ચાલશે, તો ન્યૂ યોર્કના આર્થિક વ્યવહારોને અબજો ડોલરનો ફટકો પડી શકે છે. હાલમાં અમેરિકન તંત્ર વૈકલ્પિક બસ સેવાઓ શરૂ કરવા માટે દોડધામ કરી રહ્યું છે.