નવી દિલ્હી:  એશિયા-પેસિફિક અને હિંદ મહાસાગર ક્ષેત્રમાં ભારત હવે માત્ર એક ભૌગોલિક શક્તિ નથી, પરંતુ પ્રાદેશિક સુરક્ષાના સૌથી મજબૂત સ્તંભ તરીકે ઉભરી રહ્યું છે. ચીનની વધતી જતી દરિયાઈ દખલગીરી અને બદલાતા વૈશ્વિક સમીકરણો વચ્ચે ભારત અને બાંગ્લાદેશ વચ્ચે સંરક્ષણ સહયોગના એક નવા સુવર્ણ યુગની શરૂઆત થઈ ગઈ છે. આ કડીમાં દેશની રાજધાની નવી દિલ્હી ખાતે ભારતીય આર્મી ચીફ જનરલ ઉપેન્દ્ર દ્વિવેદી અને બાંગ્લાદેશમાં ભારતના નિયુક્ત હાઇ કમિશનર દિનેશ ત્રિવેદી વચ્ચે એક અત્યંત મહત્વપૂર્ણ અને હાઈ-પ્રોફાઈલ બેઠક યોજાઈ હતી. આ બેઠકનો મુખ્ય એજન્ડા બંને દેશો વચ્ચે 'આર્મી-ટુ-આર્મી' એટલે કે સેનાથી સેના વચ્ચેના સીધા સંપર્કોને વધુ સઘન બનાવવાનો, સંયુક્ત સૈન્ય કવાયતો વધારવાનો અને સરહદ પારથી થતી નકારાત્મક ગતિવિધિઓને ડામવા માટે ગુપ્ત માહિતી (ઇન્ટેલિજન્સ) શેરિંગની વ્યવસ્થાને અભેદ્ય બનાવવાનો છે.

ભારતની 'નેબરહુડ ફર્સ્ટ' (પડોશી પ્રથમ) અને પીએમ મોદીના મહત્વાકાંક્ષી 'SAGAR' (પ્રદેશમાં બધા માટે સુરક્ષા અને વિકાસ) વિઝનને વાસ્તવિકતામાં બદલવા માટે આ વ્યૂહાત્મક પગલું ગેમ-ચેન્જર સાબિત થશે. સરહદી સુરક્ષા ઉપરાંત ભારતની નૌકાદળે પણ સમુદ્રમાં પોતાની તાકાતનો પરચો આપ્યો છે. ભારતીય નૌકાદળનું અદ્યતન યુદ્ધ જહાજ INS સુનયના બાંગ્લાદેશ, ઇન્ડોનેશિયા, મલેશિયા અને માલદીવ સહિત ૧૭ દેશોના બહુરાષ્ટ્રીય "સાગર-૨૬" મિશનને સફળતાપૂર્વક પૂર્ણ કરીને સ્વદેશ પરત ફર્યું છે. આ મિશનની સૌથી મોટી ખાસિયત એ હતી કે વિદેશી નૌસેનાના જવાનોએ ભારતીય યુદ્ધ જહાજ પર એકસાથે રહીને ટ્રેનિંગ મેળવી હતી, જે દર્શાવે છે કે નવી દિલ્હી હવે પડોશી દેશોને સાથે રાખીને દરિયાઈ સુરક્ષાની કમાન પોતાના હાથમાં લઈ ચૂક્યું છે.

બીજી તરફ, એશિયા-પેસિફિક ક્ષેત્રમાં ગેરકાયદેસર શસ્ત્રોની દાણચોરી, આતંકવાદી ફંડિંગ અને સંગઠિત અપરાધના નેટવર્કને તોડી પાડવા માટે પણ ભારતે આક્રમક રણનીતિ અપનાવી છે. આ અંતર્ગત ભારતે ઓસ્ટ્રેલિયા, ઈરાન અને ફિલિપાઇન્સ સહિત ૧૫ એશિયા-પેસિફિક દેશોના સુરક્ષા અધિકારીઓને ગેરકાયદેસર હથિયારોના ટ્રેકિંગ માટે ખાસ તાલીમ આપીને ગ્લોબલ લીડર તરીકેની ભૂમિકા ભજવી છે. ખાસ કરીને બાંગ્લાદેશના ચટ્ટોગ્રામ બંદર પર ભારતીય યુદ્ધ જહાજને મળેલી ભવ્ય વિદાય એ વાતની સાક્ષી પૂરે છે કે ઢાકા અને નવી દિલ્હી વચ્ચેનો વ્યૂહાત્મક વિશ્વાસ હવે હિમાલય જેટલો અડગ બની ગયો છે. આગામી સમયમાં આર્મી ચીફની આ રણનીતિ પૂર્વ ભારતમાં ઘૂસણખોરી અને હથિયારોની હેરફેરને રોકવામાં સૌથી મોટું હથિયાર બનશે.