નવી દિલ્હી : આમ આદમી પાર્ટી (AAP) ના રાષ્ટ્રીય સંયોજક અને દિલ્હીના પૂર્વ મુખ્યમંત્રી અરવિંદ કેજરીવાલ હવે તેમના નવા સરકારી આવાસમાં રહેવા ગયા છે. મુખ્યમંત્રી પદેથી રાજીનામું આપ્યા બાદ અને લાંબા સમય સુધી પાર્ટીના સાંસદના ઘરે રહ્યા પછી, કેજરીવાલ હવે લુટિયન્સ દિલ્હીના પ્રતિષ્ઠિત વિસ્તારમાં સ્થિત બંગલામાં સ્થાયી થયા છે. તેમણે પોતે સોશિયલ મીડિયા પ્લેટફોર્મ 'X' પર પોસ્ટ કરીને આ માહિતી શેર કરી છે.
નવું સરનામું: 95, લોધી એસ્ટેટ
અરવિંદ કેજરીવાલનું નવું ઘર હવે '95, લોધી એસ્ટેટ, નવી દિલ્હી' હશે. કેન્દ્ર સરકાર દ્વારા તેમને આ ટાઈપ-7 બંગલો આમ આદમી પાર્ટીના રાષ્ટ્રીય સંયોજક તરીકે ફાળવવામાં આવ્યો છે. કેજરીવાલે પોતાની પોસ્ટમાં સ્પષ્ટતા કરી હતી કે કોર્ટના આદેશનું પાલન કરીને કેન્દ્ર સરકારે તેમને આ ઘર ફાળવ્યું છે. ઉલ્લેખનીય છે કે, રાષ્ટ્રીય પક્ષના વડા હોવાના નાતે નિયમ મુજબ તેઓ દિલ્હીમાં સરકારી આવાસ મેળવવા માટે પાત્ર છે.
કેવું છે કેજરીવાલનું નવું આવાસ?
આ ટાઈપ-7 બંગલો અત્યંત ભવ્ય અને સુરક્ષિત માનવામાં આવે છે. આશરે 5,000 ચોરસ ફૂટના આ બંગલામાં ચાર મોટા રૂમ, બે લૉન, ત્રણ નોકર ક્વાર્ટર અને એક મોટું ગેરેજ છે. આ ઉપરાંત, પક્ષના કામકાજ માટે બંગલામાં અલગથી ઓફિસ સ્પેસ પણ આપવામાં આવી છે. VIP ગણાતા આ વિસ્તારમાં કેજરીવાલના રહેવાથી હવે ત્યાં સુરક્ષા વ્યવસ્થા પણ કડક કરી દેવામાં આવી છે.
‘શીશમહલ’ વિવાદ અને અસ્થાયી વસવાટ
મુખ્યમંત્રી પદેથી રાજીનામું આપ્યા બાદ કેજરીવાલે સિવિલ લાઈન્સ સ્થિત મુખ્યમંત્રી નિવાસસ્થાન ખાલી કર્યું હતું, જેને ભાજપે 'શીશમહલ' કહીને ભારે હોબાળો મચાવ્યો હતો. પોતાનું ઘર ખાલી કર્યા પછી કેજરીવાલ રાજ્યસભાના સાંસદ અશોક મિત્તલના ઘરે રહેતા હતા. પૂર્વ મુખ્યમંત્રીઓને દિલ્હીમાં આજીવન બંગલો મળતો નથી, પરંતુ રાષ્ટ્રીય પાર્ટીના હોદ્દાને કારણે તેમને આ નવું સરનામું મળ્યું છે.
અરવિંદ કેજરીવાલના આ સ્થળાંતર સાથે જ દિલ્હીના રાજકારણમાં ફરી એકવાર આવાસ અને સુવિધાઓને લઈને ચર્ચાઓ તેજ બની છે.