ટોક્યો : વૈશ્વિક બજારમાંથી મળી રહેલા હકારાત્મક સંકેતોને પગલે આજે એશિયન શેરબજારોમાં જોરદાર ઉછાળો જોવા મળ્યો છે. ખાસ કરીને કાચા તેલના ભાવમાં થયેલા ઘટાડા અને મોટી કંપનીઓના અપેક્ષા કરતા સારા ત્રિમાસિક પરિણામોએ રોકાણકારોનો ઉત્સાહ વધાર્યો છે. અમેરિકી શેરબજાર 'વોલ સ્ટ્રીટ' માં રાતોરાત થયેલા સુધારાની અસર આજે એશિયન ટ્રેડિંગ સેસન દરમિયાન સ્પષ્ટપણે દેખાઈ હતી.
જાપાનના નિક્કીએ તોડ્યા તમામ રેકોર્ડ
આજના કારોબારમાં સૌથી મોટો ધડાકો જાપાનના શેરબજારમાં જોવા મળ્યો હતો. જાપાનનો મુખ્ય ઇન્ડેક્સ 'નિક્કી ૨૨૫' (Nikkei 225) આશરે ૫.૬% ના તોતિંગ ઉછાળા સાથે ૬૨,૮૩૪ ની ઐતિહાસિક સપાટી પર બંધ થયો હતો. કારોબાર દરમિયાન એક સમયે તે ૬૩,૦૦૦ ના આંકડાને પણ સ્પર્શી ગયો હતો, જે અત્યાર સુધીનું સૌથી ઊંચું સ્તર છે. ટેકનોલોજી અને ઓટોમોબાઈલ સેક્ટરના શેરોમાં ભારે લેવાલીને કારણે આ તેજી જોવા મળી છે.
સમગ્ર એશિયામાં તેજીની લહેર
માત્ર જાપાન જ નહીં, પણ અન્ય એશિયન દેશોમાં પણ તેજી જોવા મળી હતી. હોંગકોંગનો 'હેંગસેંગ' ૧.૬% વધ્યો હતો, જ્યારે દક્ષિણ કોરિયાનો 'કોસ્પી' ઇન્ડેક્સ ૧.૪% થી વધુના સુધારા સાથે બંધ થયો હતો. ચીનનો 'શાંઘાઈ કમ્પોઝિટ' અડધો ટકો અને સિંગાપોરનો 'સ્ટ્રેટ્સ ટાઈમ્સ' ઇન્ડેક્સ ૦.૩% ની તેજી સાથે બંધ થયા હતા. ઓઇલના ભાવમાં ઘટાડાથી એશિયાની ઉભરતી અર્થવ્યવસ્થાઓને મોટી રાહત મળી છે, જેના કારણે ઇન્વેસ્ટર સેન્ટિમેન્ટ મજબૂત થયું છે.
યુરોપિયન બજારોમાં વેચવાલીનું દબાણ
એશિયાની તેજીથી વિપરીત, યુરોપના મુખ્ય શેરબજારો આજે ઘટાડા સાથે ખુલ્યા હતા. લંડનનો 'FTSE 100' અડધા ટકાથી વધુ નીચે ટ્રેડ થઈ રહ્યો હતો, જ્યારે જર્મનીનો 'DAX' ૦.૩% અને ફ્રાન્સનો 'CAC 40' ૦.૨% જેટલો નબળો પડ્યો હતો. વૈશ્વિક આર્થિક સ્થિતિ અને વ્યાજ દરો અંગેની અસમંજસને કારણે યુરોપિયન બજારમાં સાવચેતીભર્યું વલણ જોવા મળી રહ્યું છે. આગામી દિવસોમાં એશિયાની આ તેજી ભારતીય બજાર પર પણ સકારાત્મક અસર કરે તેવી પૂરેપૂરી શક્યતા છે.