નવી દિલ્હી :નાણામંત્રીએ કહ્યું કે, દેશનો સતત વિકસી રહેલો મધ્યમ વર્ગ અને તેની વધતી જતી ખરીદ શક્તિ એ ભારતીય અર્થવ્યવસ્થાની કરોડરજ્જુ સમાન છે.

કેન્દ્રીય નાણામંત્રી નિર્મલા સીતારમણે દેશની આર્થિક સ્થિતિને લઈને એક ખૂબ જ મહત્વપૂર્ણ અને સકારાત્મક નિવેદન આપ્યું છે. એક કાર્યક્રમમાં સંબોધન કરતા તેમણે જણાવ્યું હતું કે, ભારતના બજારો અને અર્થવ્યવસ્થાની મજબૂતી પાછળ અહીંના લોકોની અથાગ મહેનત, વિશાળ સ્થાનિક બજાર અને મધ્યમ વર્ગની વધતી જતી ખરીદ શક્તિનો સૌથી મોટો હાથ છે.

નાણામંત્રીએ ભારપૂર્વક કહ્યું કે, ભારતે પોતાની આર્થિક તાકાત અને ક્ષમતાઓ પર વધુ ભરોસો રાખવાની તેમજ આશાવાદી બનવાની જરૂર છે. તેમણે સ્પષ્ટ શબ્દોમાં કહ્યું કે હાલમાં દેશની બેંકો ખૂબ જ સારી સ્થિતિમાં છે અને ભારતીય અર્થવ્યવસ્થા સંપૂર્ણપણે મજબૂત બની રહેલી છે.

નાણામંત્રીએ જણાવ્યું કે, દેશમાં રહેલી રાજકીય સ્થિરતા અને ગરીબી દૂર કરવા માટે સરકાર દ્વારા કરવામાં આવી રહેલા સતત પ્રયાસો ભારતીય અર્થવ્યવસ્થાને વધુ મજબૂત બનાવી રહ્યા છે. દેશમાં સમયસર મળી રહેલા ઈંધણનું ઉદાહરણ આપતા તેમણે કહ્યું કે, ભારતની સપ્લાય ચેન સંપૂર્ણપણે વ્યવસ્થિત અને મજબૂત છે.

સીતારમણે કહ્યું કે દેશનો સતત વિકસી રહેલો મધ્યમ વર્ગ અને તેની વધતી જતી ખરીદ શક્તિએ ભારતીય અર્થવ્યવસ્થાની કરોડરજ્જુ સમાન છે. આ તાકાત જ દરેક વૈશ્વિક પડકારોની વચ્ચે પણ દેશની આર્થિક ગતિને જાળવી રાખે છે.

નાણામંત્રીએ ફરી એકવાર સ્પષ્ટ કર્યું કે, વર્ષ 2047 સુધીમાં દેશના દરેક નાગરિક સુધી વીમાનું સુરક્ષા કવચ પહોંચાડવું એ સરકારનો મુખ્ય ટાર્ગેટ છે. સામાન્ય લોકોને પોસાય તે માટે સરકારી યોજનાઓ હેઠળ વીમાનું પ્રીમિયમ ખૂબ જ ઓછું રાખવામાં આવ્યું છે. આ ઉપરાંત, સમાજના દરેક વર્ગને સરળતાથી લોન મળી રહે તે નાણાકીય સમાવેશની મુખ્ય પ્રાથમિકતા છે.

આર્ટિફિશિયલ ઇન્ટેલિજન્સના જમાનામાં બદલાતી જતી કામ કરવાની પદ્ધતિ અંગે નાણામંત્રીએ ચિંતા વ્યક્ત કરવાની સાથે તેનો ઉકેલ પણ સૂચવ્યો હતો. તેમણે કહ્યું કે, ભવિષ્યના પડકારોને પહોંચી વળવા અને AI આધારિત નવી નોકરીઓ માટે દેશના યુવાનોને તૈયાર કરવા માટે તેમના સ્કિલિંગ (કૌશલ્ય વિકાસ) પર વિશેષ ધ્યાન આપવાની તાતી જરૂર છે.

આ દરમિયાન SBI રિસર્ચના એક રિપોર્ટમાં અંદાજ લગાવવામાં આવ્યો છે કે, વ્યાજ દરોમાં સંભવિત વધારાની શક્યતાઓ હોવા છતાં, માર્ચ મહિના સુધીમાં ભારતનું 10-વર્ષીય બોન્ડ યીલ્ડ નરમ પડીને 6.75% થી 7% ની રેન્જમાં આવી શકે છે.