નવી દિલ્હી, તા. 16: જો તમે તમારા ઘરમાં રાખેલી જૂની સોનાની જ્વેલરી, પુશ્તૈની (વારસામાં મળેલું) સોનું, સોનાના સિક્કા કે બિસ્કિટ વેચવાનું વિચારી રહ્યા છો, તો આ સમાચાર તમારા માટે ખૂબ જ મહત્વના છે. સોનું વેચતી વખતે માત્ર બજારમાં તેનો આજનો ભાવ શું ચાલી રહ્યો છે તેટલું જ પૂરતું નથી, પરંતુ એ પણ એટલું જ અગત્યનું છે કે તે સોનું તમે પોતે ખરીદ્યું હતું, તમને કોઈની તરફથી ભેટ (ગિફ્ટ) માં મળ્યું હતું કે પછી વારસામાં મળ્યું છે. ઇન્કમટેક્સના નવા નિયમો અનુસાર, જો તમારી પાસે સોનું વેચતી વખતે તેનું ઓરિજિનલ પાકું બિલ નહીં હોય, તો તમારે ટેક્સ પેટે મોટી રકમ ગુમાવવી પડી શકે છે.

સામાન્ય રીતે લોકો એવું માનતા હોય છે કે દાદી-નાની કે માતા-પિતા તરફથી વારસામાં મળેલા સોના પર કોઈ ટેક્સ લાગતો નથી, પરંતુ વાસ્તવિકતા એ છે કે જ્યારે તમે આ પુશ્તૈની સોનું બજારમાં વેચવા જાવ છો ત્યારે તેના પર કેપિટલ ગેઇન્સ ટેક્સ (Capital Gains Tax) લાગુ થાય છે. જો તમારી પાસે સોનાની ખરીદીનું કોઈ બિલ કે પાકી રસીદ ન હોય, તો આવકવેરા વિભાગ દ્વારા તેની મૂળ ખરીદ કિંમત (Cost of Acquisition) નક્કી કરવામાં મુશ્કેલી પડે છે. આવી સ્થિતિમાં, જો પ્રોપર્ટી કે સોનાના વેચાણ અંગેનો કોઈ વિવાદ ઊભો થાય અથવા યોગ્ય દસ્તાવેજો રજૂ ન કરી શકાય, તો કરદાતાએ બિલ વગરના સોના પર ઘણો વધારે ટેક્સ અથવા દંડ ચૂકવવો પડી શકે છે.

નાણાકીય બાબતોના નિષ્ણાતોના જણાવ્યા મુજબ, માત્ર ફિઝિકલ ગોલ્ડ જ નહીં પરંતુ ડિજિટલ ગોલ્ડ અથવા સોવરિન ગોલ્ડ બોન્ડના વેચાણ પર પણ નિયમ અનુસાર ટેક્સ વસૂલવામાં આવે છે. તેથી, કોઈપણ પુશ્તૈની દાગીના વેચતા પહેલાં તેની ખરીદીનું વર્ષ, અંદાજિત મૂલ્ય અથવા જો કોઈ વસિયતનામું (Will) હોય તો તેના દસ્તાવેજો તૈયાર રાખવા હિતાવહ છે. જો સોનાનું પાકું બિલ ઉપલબ્ધ ન હોય, તો માન્ય જ્વેલર્સ પાસેથી તેનું વેલ્યુએશન સર્ટિફિકેટ કઢાવી લેવું જોઈએ, જેથી ભવિષ્યમાં ઇન્કમટેક્સની કોઈ નોટિસ આવે તો કાનૂની ગૂંચવણોથી બચી શકાય.