દુબઈ:   ઈરાન અને અમેરિકા-ઈઝરાયલ વચ્ચેનો સંઘર્ષ હવે એક એવા વળાંક પર પહોંચ્યો છે જ્યાંથી વૈશ્વિક મહાયુદ્ધનો ભય વધી ગયો છે. શુક્રવારે ઈરાનના બે વરિષ્ઠ સૂત્રોએ પુષ્ટિ કરી છે કે તેહરાને તેની અત્યાધુનિક હવાઈ સંરક્ષણ પ્રણાલીને હાઈ-એલર્ટ પર મૂકી દીધી છે. ઈરાનને આશંકા છે કે અમેરિકા કોઈપણ ક્ષણે તેના પર તીવ્ર હવાઈ હુમલા કરી શકે છે, જેની પાછળ ઈઝરાયલ પણ જોડાઈ શકે છે. ઈરાને ચેતવણી આપી છે કે જો તેના પર એક પણ મિસાઈલ છોડવામાં આવશે, તો તેનો બદલો એટલો ભયાનક હશે જે આખા ગલ્ફ ક્ષેત્રને લપેટમાં લઈ લેશે.

આ તણાવ વચ્ચે યુનાઈટેડ આરબ અમીરાત  ના નિવેદને આંતરરાષ્ટ્રીય સ્તરે ખળભળાટ મચાવ્યો છે. સમાચાર એજન્સી રોઇટર્સના જણાવ્યા અનુસાર, UAE ના એક વરિષ્ઠ અધિકારીએ સ્પષ્ટ કર્યું છે કે તેઓ હોર્મુઝ અંગે ઈરાનની એકપક્ષીય વ્યવસ્થા પર હવે જરાય વિશ્વાસ કરતા નથી. ઉલ્લેખનીય છે કે, છેલ્લા બે મહિનાથી ઈરાની નાકાબંધીને કારણે આ વ્યૂહાત્મક દરિયાઈ માર્ગ લગભગ ઠપ છે, જેનાથી વિશ્વના ૨૦% તેલ અને ગેસના પુરવઠામાં વિક્ષેપ પડ્યો છે. યુએસ નેવી ઈરાની ક્રૂડ ઓઇલની નિકાસ રોકી રહી હોવાથી બંને પક્ષો વચ્ચેનો અવિશ્વાસ ચરમસીમાએ પહોંચ્યો છે.

આ સંઘર્ષની સીધી અસર સામાન્ય લોકોના ખિસ્સા પર પડી રહી છે. ગુરુવારે વૈશ્વિક તેલના ભાવ ચાર વર્ષની ટોચે પહોંચી ગયા હતા, જેનાથી વિશ્વભરમાં આર્થિક મંદીની દહેશત વધી છે. ૮ એપ્રિલથી કાગળ પર યુદ્ધવિરામ અમલમાં હોવા છતાં, ગ્રાઉન્ડ રિપોર્ટ્સ સૂચવે છે કે અમેરિકાના પ્રમુખ ડોનાલ્ડ ટ્રમ્પ ઈરાનને વાટાઘાટોના ટેબલ પર લાવવા માટે લશ્કરી દબાણ વધારવાની યોજના બનાવી રહ્યા છે. જો ખરેખર નવો હુમલો થાય છે, તો હોર્મુઝ સ્ટ્રેટ સંપૂર્ણપણે બંધ થઈ શકે છે, જે વૈશ્વિક ઉર્જા બજાર માટે વિનાશક સાબિત થશે.