લખનૌ : ઉત્તર પ્રદેશના રાજકારણમાં અને બહુજન સમાજ પાર્ટી (BSP) ના આંતરિક માળખામાં ફરી એકવાર મોટો ભૂકંપ આવ્યો છે. બસપા સુપ્રીમો માયાવતીએ તેમના ભત્રીજા આકાશ આનંદ સામે મોટી કાર્યવાહી કરતા તેમને રાષ્ટ્રીય સંયોજક (National Coordinator) ના પદ પરથી હટાવી દીધા છે અને તમામ મુખ્ય જવાબદારીઓ પાછી ખેંચી લીધી છે. લખનૌ ખાતે યોજાયેલી રાષ્ટ્રીય કારોબારીની મહત્વની બેઠકમાં આકાશ આનંદને આમંત્રણ પણ આપવામાં આવ્યું ન હતું. જોકે, આ બેઠકમાં આકાશના નાના ભાઈ ઈશાન આનંદની અચાનક હાજરીએ ઉત્તર પ્રદેશના રાજકીય વર્તુળોમાં ૨૦૨૭ ની ચૂંટણી પહેલાં નવી ચર્ચાઓ જગાવી છે.

આકાશ આનંદનું ડિમોશન અને 'અપરિપક્વ' હોવાનો દાવો

બેઠક દરમિયાન માયાવતીએ સ્પષ્ટ શબ્દોમાં જણાવ્યું હતું કે આકાશ આનંદ હજુ પણ રાજકીય રીતે અપરિપક્વ છે. ચૂંટણીઓ નજીક આવી રહી છે ત્યારે પાર્ટીમાં તેમને કોઈ મોટી કે નિર્ણાયક જવાબદારી આપવી અયોગ્ય રહેશે. માયાવતીના આ કડક આદેશ બાદ આકાશ આનંદે સોશિયલ મીડિયા પ્લેટફોર્મ 'X' પરથી પણ પોતાનું પ્રોફાઇલ બાયો બદલીને માત્ર 'બસપા કાર્યકર' કરી દીધું છે. ઉલ્લેખનીય છે કે, ભૂતકાળમાં પણ આકાશ આનંદને પાર્ટીમાંથી હાંકી કાઢવામાં આવ્યા હતા અને બાદમાં ફરી સામેલ કરાયા હતા.

કોણ છે ઈશાન આનંદ? બીજા ભત્રીજાની એન્ટ્રીથી અટકળો

આકાશ આનંદની ગેરહાજરી વચ્ચે તેમના ૨૭ વર્ષીય નાના ભાઈ ઈશાન આનંદે બેઠકમાં હાજરી આપતાં જ માયાવતી હવે બીજા ભત્રીજાને પ્રમોટ કરશે કે કેમ તે અંગે પ્રશ્નો ઊભા થયા છે. ઈશાન આનંદ માયાવતીના ભાઈ આનંદ કુમારના નાના પુત્ર છે અને તેમણે લંડનની પ્રતિષ્ઠિત વેસ્ટમિન્સ્ટર યુનિવર્સિટીમાંથી કાયદાનો (Law) અભ્યાસ કર્યો છે. અગાઉ માયાવતીના જન્મદિવસે જોવા મળેલા ઈશાન હાલમાં પિતાના બિઝનેસમાં મદદ કરે છે, પરંતુ કારોબારી બેઠકમાં તેમની હાજરી આગામી સમયમાં મોટા રાજકીય રોલ તરફ ઈશારો કરે છે.

RSS અને મોહન ભાગવત પર આકરા પ્રહાર

સંગઠનાત્મક ફેરફારો ઉપરાંત માયાવતીએ આ બેઠકમાં રાષ્ટ્રીય સ્વયંસેવક સંઘ (RSS) પર પણ આકરા પ્રહારો કર્યા હતા. RSS પ્રમુખ મોહન ભાગવતના અમેરિકામાં આપેલા નિવેદનનો ઉલ્લેખ કરતા માયાવતીએ કહ્યું કે સંઘના કથની અને કરનીમાં મોટો તફાવત છે. જાતિવાદ, અસમાનતા અને લઘુમતીઓના રક્ષણ જેવા મુદ્દાઓ પર RSS પોતાનો વિશ્વાસ ગુમાવી ચૂક્યું છે. તેમણે કાંશીરામજીની પુણ્યતિથિ નિમિત્તે દેશભરમાં મોટા કાર્યક્રમો યોજવા અને ૨૦૨૭ ની ચૂંટણી માટે સંગઠનને પાયામાંથી મજબૂત કરવા કાર્યકરોને આદેશ આપ્યો હતો.