મુંબઈ, તા.22: ખાનગી ક્ષેત્રની દેશની અગ્રણી ICICI બેંકે તેના બચત ખાતાધારકો (Savings Account Holders) માટે કેશ ટ્રાન્ઝેક્શન ચાર્જિસ સંબંધિત નીતિમાં મહત્વપૂર્ણ ફેરફાર કર્યો છે. બેંક દ્વારા આગામી ૧ ડિસેમ્બર, ૨૦૨૬થી નિયત માસિક મફત મર્યાદા (Free Monthly Limit) વટાવનારા ગ્રાહકો માટે રોકડ જમા અને ઉપાડ પરના શુલ્કમાં વધારો કરવાની સત્તાવાર જાહેરાત કરવામાં આવી છે.

બેંક દ્વારા ગ્રાહકોને ઈમેલ મારફતે મોકલવામાં આવેલી વિગતો અનુસાર, ગ્રાહકોને મળતી મફત વ્યવહારોની માસિક સંખ્યા અને રકમની મર્યાદામાં કોઈ કપાત કરવામાં આવી નથી. બચત ખાતાધારકોને દર મહિને 3 વખત મફત રોકડ જમા અને 3 વખત મફત રોકડ ઉપાડની સુવિધા મળતી રહેશે, જેમાં મહત્તમ માસિક મર્યાદા રૂ. ૧ લાખ સુધીની રહેશે.

પરંતુ, જો કોઈ ગ્રાહક નક્કી કરેલી આ માસિક મફત મર્યાદા વટાવશે, તો તેમણે સુધારેલા દરો મુજબ વધુ ચાર્જ ચૂકવવો પડશે. હાલમાં ફ્રી લિમિટથી વધુના વ્યવહારો પર પ્રતિ રૂ. ૧,૦૦૦ દીઠ રૂ. ૩.૫૦ નો ચાર્જ લેવામાં આવતો હતો, જે વધારીને હવે રૂ. ૪ પ્રતિ રૂ. ૧,૦૦૦ કરવામાં આવ્યો છે. આ સાથે જ લઘુત્તમ શુલ્ક (Minimum Charge) રૂ. ૧૫૦ નિર્ધારિત કરવામાં આવ્યું છે.

નવા નિયમો મુજબ, જો કોઈ ગ્રાહક રૂ. ૧.૦૧ લાખનો રોકડ વ્યવહાર કરે છે તો તેને રૂ. ૧૫૦ નો ચાર્જ લાગશે, જ્યારે રૂ. ૧.૩૮ લાખના રોકડ વ્યવહાર પર રૂ. ૧૫૨ નો શુલ્ક ચૂકવવો પડશે. આ સુધારેલા શુલ્ક ICICI બેંકની તમામ શાખાઓમાંથી કરાતા રોકડ વ્યવહારો તેમજ 'કેશ રિસાયકલર મશીન' (CRM) દ્વારા કરવામાં આવતા જમા વ્યવહારો પર સમાન રીતે લાગુ પડશે.

બેંકે સ્પષ્ટ કર્યું છે કે જે ગ્રાહકો પોતાના માસિક વ્યવહારો હાલની રૂ. ૧ લાખની મફત મર્યાદા અને 3 મફત વ્યવહારોની અંદર જ રાખે છે, તેમના પર આ વધારાની કોઈ અસર થશે નહીં. આ પગલાંનો મુખ્ય ઉદ્દેશ્ય ડિજિટલ ટ્રાન્ઝેક્શન્સને પ્રોત્સાહન આપવાનો અને રોકડ વપરાશ ઘટાડવાનો છે.

આ ઉપરાંત, ICICI બેંક સામાન્ય નાગરિકો માટે ફિક્સ્ડ ડિપોઝિટ (FD) પર ૬.૫૦ ટકા સુધી અને વરિષ્ઠ નાગરિકો માટે ૭.૧૦ ટકા સુધીના વ્યાજ દર ઓફર કરી રહી છે, જે દરો રૂ. ૩ કરોડથી ઓછી થાપણો પર અમલી છે.