કોલકાતા, તા.૧૮: પશ્ચિમ બંગાળના રાજકારણમાં ભારે ઉથલપાથલ વચ્ચે અખિલ ભારતીય મમતા તૃણમૂલ કોંગ્રેસના સુપ્રીમો અને ભૂતપૂર્વ મુખ્યમંત્રી મમતા બેનર્જીએ એક મોટી રાજકીય જાહેરાત કરી છે. શુક્રવારે મીડિયાને સંબોધતા તેમણે સ્પષ્ટ કર્યું કે તેમનું જૂથ નંદીગ્રામ વિધાનસભા પેટાચૂંટણી તેમજ આસામમાં કોંગ્રેસના ઉમેદવારોને પૂર્ણ સમર્થન આપશે. મમતા બેનર્જીએ જણાવ્યું હતું કે વર્તમાન પરિસ્થિતિમાં ભાજપ સામે લડવા અને દેશના વ્યાપક હિતને ધ્યાનમાં રાખીને તેમણે આ નિર્ણાયક પગલું ભર્યું છે.

આ રાજકીય ઘટનાક્રમ ત્યારે સામે આવ્યો જ્યારે નંદીગ્રામ બેઠક પરથી મમતા જૂથના ઉમેદવાર સંચિતા પ્રધાન ડેએ પશ્ચિમ બંગાળના મુખ્યમંત્રી સુવેન્દુ અધિકારી સાથેની ખાસ મુલાકાત બાદ અચાનક પોતાનું નામાંકન પત્ર પાછું ખેંચી લીધું હતું. બીજી તરફ, ચૂંટણી પંચે ટીએમસીના બે હરીફ જૂથોને અલગ-અલગ નામ અને પ્રતીકો ફાળવી દીધા છે. મમતા બેનર્જીના જૂથને 'મમતા ઓલ ઈન્ડિયા તૃણમૂલ કોંગ્રેસ' અને પ્રતીક તરીકે 'ફૂટબોલ ખેલાડી' મળ્યું છે, જ્યારે ઋતબ્રત બેનર્જીના જૂથને 'ડેમોક્રેટિક તૃણમૂલ કોંગ્રેસ' અને 'પરબિડીયું' પ્રતીક ફાળવવામાં આવ્યું છે.

ચૂંટણી પંચના આ નિર્ણય પર આકરા પ્રહારો કરતા મમતા બેનર્જીએ તેને દેશના લોકશાહી ઇતિહાસમાં "કાળો દિવસ" ગણાવ્યો હતો. તેમણે આરોપ લગાવ્યો હતો કે આ નિર્ણય અસંવિધાનિક, ગેરકાયદેસર અને રાજકીય બદલાની ભાવનાથી પ્રેરિત છે. ભાજપ પર નિશાન સાધતા તેમણે તેને 'જુમલા પાર્ટી' કહી હતી અને આરોપ મૂક્યો હતો કે શાસક પક્ષ બંધારણીય સંસ્થાઓ, શિક્ષણ પ્રણાલી અને વિપક્ષી નેતાઓને નબળા પાડવાનું કામ કરી રહ્યો છે. તેમણે સત્તાધીશોને ચેતવણી આપતાં કહ્યું કે સત્તા કાયમી નથી હોતી અને દરેક પક્ષે પોતાની મર્યાદા સમજવી જોઈએ.