તા. ૧૩ નવેમ્બરે ર૦ર૫ વિક્રમ સંવત ર૦૮૨ કારતક વદ – ૯ ગુરૂવાર
૬૮ લાખ પેન્શનર્સ માટે મોટા ખુશખબરઃ નિવૃત્તિ ભથ્થામાં ૬૭% સુધીનો બમ્પર વધારો કરવાની માગણી
કેન્દ્રીય સ્ટાફ સંગઠનોએ ૬૮ લાખ નિવૃત્ત સેવકોના લાભાર્થે સરકાર સમક્ષ વ્યાપક પ્રસ્તાવો મૂક્યા : આખરી પગારના ૬૭% ભથ્થું, ૫૦% કુટુંબ સહાય અને લઘુત્તમ રકમ ૪૫,૦૦૦ રૂપિયા કરવાની માગણી કરાઈ છે, ફિટમેન્ટ ફેક્ટરના આધારે માસિક રકમમાં મોટો ઉછાળો સંભવ છે
નવી દિલ્હી,તા.૨: નવા નાણાકીય આયોગની ચર્ચાઓ તેજ બનવાની સાથે દેશભરના લાખો નિવૃત્ત સરકારી સેવકોમાં આર્થિક સુધારાની નવી આશા જાગી છે. કેન્દ્ર સરકાર હેઠળ સેવા આપી ચૂકેલા અંદાજે ૬૮ લાખ નિવૃત્તો અને હાલ સેવારત ૪૮ લાખથી વધુ કર્મચારીઓના હિતમાં વિવિધ રાષ્ટ્રીય સંગઠનોએ નાણા મંત્રાલય સમક્ષ વ્યાપક રજૂઆતો કરી છે. નિવૃત્તિ બાદ સન્માનજનક જીવનનિર્વાહ જળવાઈ રહે તે હેતુથી મૂળભૂત રકમમાં વધારો કરવા ઉપરાંત આખરી વેતનના મહત્તમ હિસ્સા જેટલી રકમ નિયમિત ભથ્થા તરીકે આપવાની માંગ કરવામાં આવી છે.
આ વખતે આગામી નાણાકીય માળખાનો વ્યાપ અત્યંત વિશાળ રહેવાનો છે. તેના સીધા લાભાર્થીઓમાં કાર્યરત કર્મચારીઓ કરતાં નિવૃત્ત સેવકોની સંખ્યા આશરે ૪૦% જેટલી વધુ નોંધાયેલી છે.
આ લાભાર્થીઓ પૈકી બહુમતી નિવૃત્તો જૂની વ્યવસ્થા એટલે કે ઓલ્ડ પેન્શન સ્કીમના દાયરામાં સુરક્ષિત છે. પરિણામે મૂળભૂત ગણતરી માટેનો આધાર અંક નિર્ધારિત થતાંની સાથે જ માસિક મળવાપાત્ર રકમમાં મોટો વધારો થવાની સંભાવના વ્યક્ત કરાઈ રહી છે.
એનસી-જેસીએમ, એઆઈડીઈએફ અને ભારત પેન્શનર્સ સમાજ જેવા વરિષ્ઠ સંઘોએ કેન્દ્ર સરકાર સમક્ષ નક્કર દરખાસ્તો મોકલી છે. તેમાં માસિક ભથ્થાના પ્રવર્તમાન દરો વધારીને સામાન્ય ભથ્થું ૬૭% અને કુટુંબ માટેની રકમ ૫૦% કરવાની પ્રથમ માગણી છે.
બીજી તરફ ભારત પેન્શનર્સ સમાજે લઘુત્તમ મૂળભૂત રકમ સીધી વધારીને ૪૫,૦૦૦ રૂપિયા માસિક કરવા જણાવ્યું છે. રેલવે સંગઠનો અને કર્મચારી ફેડરેશને સિવિલ નિવૃત્તો માટે પણ લશ્કરી દળોની માફક વન રેન્ક વન પેન્શન પદ્ધતિ દાખલ કરવા અપીલ કરી છે, જ્યારે ટપાલ સંગઠનોએ આ ભંડોળને વિભાગીય બજેટમાંથી અલગ કરી ભારતના સંચિત નિધિ હેઠળ લાવવા અનુરોધ કર્યો છે.
પ્રવર્તમાન નિયમો અનુસાર કર્મચારી નિવૃત્ત થાય ત્યારે તેના છેલ્લા મળેલા મૂળ પગાર અથવા નિવૃત્તિ અગાઉના છેલ્લા ૧૦ મહિનાના સરેરાશ વેતનના ૫૦% રકમ નિયમિત માસિક ચૂકવવામાં આવે છે. જ્યારે આકસ્મિક સંજોગોમાં કુટુંબ પેન્શન તરીકે ૩૦% રકમ નક્કી કરાયેલી છે.
જો કોઈ કર્મચારીનો છેલ્લો મૂળ પગાર ૧૦૦,૦૦૦ રૂપિયા રહ્યો હોય, તો હાલ તેને ૫૦,૦૦૦ રૂપિયા માસિક મળે છે. સંગઠનોની નવી માગણી સ્વીકારાય તો ૬૭% મુજબ આ રકમ વધીને સીધી ૬૭,૦૦૦ રૂપિયા થશે. તેવી જ રીતે કુટુંબ સહાયની રકમ ૩૦% થી વધીને ૫૦% એટલે કે ૫૦,૦૦૦ રૂપિયા સુધી પહોંચી શકે છે.
વેતન અને નિવૃત્તિ ભથ્થું નક્કી કરવામાં ગુણક અંક એટલે કે ફિટમેન્ટ ફેક્ટર સૌથી અગત્યની ભૂમિકા ભજવે છે. વિવિધ ગુણક પરિબળો લાગુ કરવામાં આવે ત્યારે અંદાજિત સ્થિતિ નીચે મુજબ બની શકે છે.
૧.૯૨ ફેક્ટર લાગુ થતાં વર્તમાન મૂળ પેન્શન ૯,૦૦૦ રૂપિયા સામે સંભવિત નવી મૂળ રકમ ૧૭,૨૮૦ રૂપિયા થશે (અંદાજિત ચોખ્ખો વધારોઃ ૮,૨૮૦ રૂપિયા).
૨.૫૭ ફેક્ટર લાગુ થતાં: વર્તમાન મૂળ પેન્શન ૯,૦૦૦ રૂપિયા સામે સંભવિત નવી મૂળ રકમ ૨૩,૧૩૦ રૂપિયા થશે (અંદાજિત ચોખ્ખો વધારોઃ ૧૪,૧૩૦ રૂપિયા).
૨.૮૬ ફેક્ટર લાગુ થતાં: વર્તમાન મૂળ પેન્શન ૯,૦૦૦ રૂપિયા સામે સંભવિત નવી મૂળ રકમ ૨૫,૭૪૦ રૂપિયા થશે (અંદાજિત ચોખ્ખો વધારોઃ ૧૬,૭૪૦ રૂપિયા).
૩.૬૮ ફેક્ટર લાગુ થતાં: વર્તમાન મૂળ પેન્શન ૯,૦૦૦ રૂપિયા સામે સંભવિત નવી મૂળ રકમ ૩૩,૧૨૦ રૂપિયા થશે (અંદાજિત ચોખ્ખો વધારોઃ ૨૪,૧૨૦ રૂપિયા).
કેબિનેટ મંજૂરી અને નિવૃત્તોના જીવનધોરણ પર સંભવિત પ્રભાવ
આ સમગ્ર આંકડાઓ કર્મચારી મહામંડળોની સત્તાવાર રજૂઆતો અને સંભવિત અંદાજો પર આધારિત છે. આ ભલામણો પર અંતિમ મહોર નાણાકીય આયોગના અહેવાલ અને કેન્દ્રીય મંત્રીમંડળની ઔપચારિક બેઠક બાદ જ લાગશે.
વધતી મોંઘવારી સામે વરિષ્ઠ નાગરિકોની ખરીદશક્તિ અને સામાજિક સુરક્ષા સુનિﾍતિ કરવા સરકાર હકારાત્મક નિર્ણય લેશે તેવી અપેક્ષા રાખવામાં આવી રહી છે. હાલ સમગ્ર વહીવટી વર્તુળો અને નિવૃત્ત સભ્યો સરકારની આગામી સત્તાવાર જાહેરાતની આતુરતાપૂર્વક રાહ જોઈ રહ્યા છે.
(10:45 AM IST)
છેલ્લા 8 દિવસમાં સૌથી લોકપ્રિય 
