​અમદાવાદ:મોંઘવારીનો માર ઝેલી રહેલા સામાન્ય નાગરિકો અને વાહનચાલકો માટે રવિવારે પણ રાહતના સમાચાર સામે આવ્યા છે. સરકારી ઓઈલ માર્કેટિંગ કંપનીઓ (OMCs) દ્વારા આજે, ૧૫ નવેમ્બરના રોજ પણ પેટ્રોલ અને ડીઝલના ભાવમાં કોઈ જ ફેરફાર કરવામાં આવ્યો નથી. દેશભરમાં ઈંધણના દરો મે મહિનાના સ્તર પર જ સ્થિર રાખવામાં આવ્યા છે, જેના કારણે સામાન્ય જનતાના ખિસ્સા પર કોઈ વધારાનો બોજ પડ્યો નથી.

​આંતરરાષ્ટ્રીય બજારમાં ક્રૂડ ઓઈલ નરમ પડ્યું

ઘરેલુ બજારમાં ભાવ સ્થિર રહેવા પાછળ આંતરરાષ્ટ્રીય બજારના સકારાત્મક સંકેતો જવાબદાર છે. વૈશ્વિક બજારમાં કાચા તેલ (ક્રૂડ ઓઈલ) ના ભાવમાં નોંધપાત્ર ઘટાડો જોવા મળ્યો છે. અગાઉ ઓક્ટોબર મહિનામાં ક્રૂડ ઓઈલનો ભાવ ઉછળીને ૧૧૬ ડૉલર પ્રતિ બેરલની ઊંચી સપાટીએ પહોંચી ગયો હતો, જે હવે ઘટીને આશરે ૯૦ ડૉલર પ્રતિ બેરલની આસપાસ આવી ગયો છે. જોકે, આ ભાવ હજુ પણ ફેબ્રુઆરી મહિનાના સ્તર કરતા ઘણો ઊંચો છે. તેમ છતાં, ક્રૂડ ઓઈલ સસ્તું થવાથી ઓઈલ કંપનીઓને પ્રતિ લીટર થતું નુકસાન ઘટ્યું છે, જોકે કંપનીઓ હજુ પણ ખોટ ખાઈને જ પેટ્રોલ-ડીઝલનું વેચાણ કરી રહી છે.

​મે મહિના બાદ સરકારી કંપનીઓએ ભાવ વધાર્યા નથી

ઉલ્લેખનીય છે કે, જાહેર ક્ષેત્રની ઓઈલ માર્કેટિંગ કંપનીઓ દ્વારા છેલ્લે મે મહિનામાં (૧૫ મે થી ૨૫ મે દરમિયાન) કુલ ચાર વખત ઈંધણના ભાવમાં વધારો ઝીંકવામાં આવ્યો હતો. તે સમયે ઘરેલુ બજારમાં પેટ્રોલ-ડીઝલના ભાવમાં પ્રતિ લીટર આશરે ₹૭.૫૦ સુધીનો વધારો થયો હતો. ત્યારથી લઈને આજદિન સુધી સરકારી કંપનીઓએ કિંમતો યથાવત રાખી છે. જોકે, તાજેતરના દિવસોમાં કેટલીક ખાનગી (પ્રાઈવેટ) ઓઈલ કંપનીઓ દ્વારા પેટ્રોલ અને ડીઝલના દરોમાં વધારો કરવામાં આવ્યો હોવાનું સામે આવ્યું છે.

​