નવી દિલ્હી : નવી દિલ્હીના જંતર મંતર ખાતે સીજેપી (CJP) દ્વારા હાથ ધરાયેલા વિરોધ પ્રદર્શનને લઈને ભારતીય જનતા પાર્ટીએ વિપક્ષો અને આમ આદમી પાર્ટી (AAP) પર આકરા રાજકીય પ્રહારો કર્યા છે. ભાજપ કાર્યાલય ખાતે યોજાયેલી એક ખાસ પત્રકાર પરિષદમાં પૂર્વ કાયદા મંત્રી અને ભાજપના જ્યેષ્ઠ સાંસદ રવિશંકર પ્રસાદે સ્પષ્ટ શબ્દોમાં જણાવ્યું હતું કે, દેશ સંસદ, કાયદા અને બંધારણીય સુવિધાઓથી ચાલશે, રસ્તા પરના વિરોધ પ્રદર્શનોથી નહીં.

ભાજપ સાંસદે સ્પષ્ટતા કરી હતી કે તેમની પાર્ટી લોકશાહીમાં વિરોધ પ્રદર્શન કરવાના અધિકારની વિરુદ્ધમાં નથી, પરંતુ રસ્તા પર ઉતરીને અરાજકતા ફેલાવવી અને વિરોધને 'રાજકીય હથિયાર' બનાવવું યોગ્ય નથી. તેમણે આક્ષેપ કર્યો હતો કે ચૂંટણી પંચના મુખ્ય કમિશ્નરના રાજીનામાની માગણી કરી રહેલી CJP સંસ્થા વાસ્તવમાં આમ આદમી પાર્ટી અને અન્ય વિપક્ષી દળોને રાજકીય ફાયદો પહોંચાડવા માટે 'શેડો બોક્સિંગ' કરી રહી છે, જેનો મુખ્ય હેતુ ચૂંટણી પ્રક્રિયાને અસ્થિર કરવાનો છે.

વિપક્ષી નેતાઓ પર નિશાન સાધતા તેમણે ઉમેર્યું હતું કે પ્રદર્શન સ્થળે અરવિંદ કેજરીવાલ, મમતા બેનર્જી તેમજ સીપીઆઈ (CPI) અને સીપીએમ (CPM) ના નેતાઓની હાજરી જ દર્શાવે છે કે આ આંદોલનને કઈ રીતે રાજકીય રંગ આપવામાં આવી રહ્યો છે. તેમણે કટોકટીપૂર્ણ લહેકામાં જણાવ્યું કે જો વિપક્ષી નેતાઓને ચૂંટણી પરિણામો કે ચૂંટણી પંચ સામે વાંધો હોય તો તેમણે કોર્ટ કે કાનૂની માર્ગ અપનાવવો જોઈએ. વારંવાર પ્રજા દ્વારા નકારવામાં આવેલા લોકો સુપ્રીમ કોર્ટમાં પીઆઈએલ (PIL) દાખલ કરીને કે રસ્તા પર હંગામો કરીને દેશનું શાસન ચલાવી શકે નહીં.

મતદાર યાદીઓના સુધારણા (SIR) વિવાદ પર સ્પષ્ટતા કરતા રવિશંકર પ્રસાદે જણાવ્યું કે દેશમાં અત્યાર સુધીમાં ૯ થી વધુ વખત SIR પ્રક્રિયા થઈ ચૂકી છે. તપાસ દરમિયાન ૨.૮૯ કરોડ મૃત્યુ પામેલા મતદારો, ૬.૩ કરોડ વિસ્થાપિત થયેલા લોકો અને ૧ કરોડ ડુપ્લિકેટ નામો સામે આવ્યા છે. કાયદા મુજબ આવા નામો સુધારવા જરૂરી છે. તેમણે ઉમેર્યું કે જો કોઈનું નામ ભૂલથી રદ થયું હોય તો તેને ઉમેરવાની પણ ચોક્કસ કાનૂની પ્રક્રિયા છે. કાયદાકીય પ્રક્રિયાઓને નેવે મૂકીને રાજકીય ફાયદા માટે વિરોધ કરવો એ લોકશાહી માળખા માટે હાનિકારક છે.