બેંગલુરુ : કર્ણાટકની રાજધાની બેંગલુરુમાં રાજકીય ગરમાવો તેજ બન્યો છે. બેંગલુરુ ભાજપે પોલીસ કમિશનર સીમંત કુમાર સિંહને મળીને કાર્યકર્તા ઉમર ખાલિદના સમર્થનમાં આયોજિત એક ઇવેન્ટને તાત્કાલિક અસરથી રદ કરવાની વિનંતી કરી છે. બેંગલુરુ સેન્ટ્રલના સાંસદ પી.સી. મોહનના નેતૃત્વમાં ભાજપના પ્રતિનિધિમંડળે કમિશનરને એક મેમોરેન્ડમ સુપરત કર્યું છે, જેમાં આ કાર્યક્રમને શહેરની શાંતિ અને સુરક્ષા માટે જોખમી ગણાવ્યો છે.
શું છે સમગ્ર કાર્યક્રમ?
સૂત્રોના જણાવ્યા અનુસાર, ૨૮ એપ્રિલના રોજ બેંગલુરુમાં 'ઉમર ખાલિદ એન્ડ હિઝ વર્લ્ડ' પુસ્તક પર આધારિત એક ચર્ચા અને વાંચન કાર્યક્રમનું આયોજન કરવામાં આવ્યું છે. 'ઉમર ખાલિદ પ્રપંચ' પ્લેટફોર્મ હેઠળ યોજાનાર આ ઇવેન્ટમાં કેટલાક ઇતિહાસકારો અને બૌદ્ધિકો ભાગ લેવાના છે. ઉમર ખાલિદ હાલમાં ૨૦૨૦ના દિલ્હી રમખાણોના કાવતરામાં સંડોવણીના આરોપસર આતંકવાદ વિરોધી કાયદા (UAPA) હેઠળ જેલમાં છે.
ભાજપનો 'શહેરી નક્સલવાદ' પર પ્રહાર
ભાજપે પોતાના મેમોરેન્ડમમાં ગંભીર આક્ષેપો કરતા જણાવ્યું છે કે, દેશભરમાં નક્સલવાદ સામે કડક પગલાં લેવામાં આવી રહ્યા છે, પરંતુ 'શહેરી નક્સલવાદી' તત્વો હજુ પણ સક્રિય છે અને રાષ્ટ્ર વિરોધી પ્રવૃત્તિઓને પ્રોત્સાહન આપી રહ્યા છે. ભાજપે કહ્યું કે, "ઉમર ખાલિદ પર અત્યંત ગંભીર આરોપો છે અને છેલ્લા ત્રણ વર્ષથી અદાલતોએ તેને જામીન આપ્યા નથી. આવા વ્યક્તિનું જાહેરમાં મહિમામંડન કરવું એ ગુનાહિત માનસિકતાને પ્રોત્સાહન આપવા સમાન છે."
કાયદો અને વ્યવસ્થાની ચેતવણી
ભાજપ નેતાઓએ ચિંતા વ્યક્ત કરી છે કે શહેરમાં પહેલેથી જ ઉમર ખાલિદના સમર્થનમાં દિવાલ લખાણો અને સૂત્રોચ્ચાર જોવા મળ્યા છે. જો આ કાર્યક્રમ આગળ વધશે અને તેના કારણે કાયદો અને વ્યવસ્થાની કોઈ પણ પરિસ્થિતિ ઊભી થશે, તો તેના માટે ભાજપ જવાબદાર રહેશે નહીં. પક્ષે શહેરના હિતમાં આ કાર્યક્રમ માટે આપેલી પરવાનગી પાછી ખેંચી લેવા પોલીસને વિનંતી કરી છે.
સુપ્રીમ કોર્ટનું કડક વલણ
ઉલ્લેખનીય છે કે, ૨૦ એપ્રિલના રોજ સુપ્રીમ કોર્ટે પણ ઉમર ખાલિદની જામીન અરજીની સમીક્ષા કરવાની અરજી ફગાવી દીધી હતી. કોર્ટે અવલોકન કર્યું હતું કે ૨૦૨૦ના દિલ્હી રમખાણોના આયોજન અને વ્યૂહાત્મક દિશામાં ખાલિદ અને અન્ય આરોપીઓની સંડોવણી હોવાના વાજબી આધારો છે. ફેબ્રુઆરી ૨૦૨૦માં ઉત્તર-પૂર્વ દિલ્હીમાં ફાટી નીકળેલા આ રમખાણોમાં ૫૩ લોકોના મોત થયા હતા.
બેંગલુરુ પોલીસ હવે આ સંવેદનશીલ મામલે શું નિર્ણય લે છે, તેના પર સૌની નજર ટકેલી છે. શું લોકશાહીમાં અભિવ્યક્તિની સ્વતંત્રતાના નામે આ કાર્યક્રમ ચાલુ રહેશે કે સુરક્ષાના કારણોસર તેને અટકાવવામાં આવશે, તે જોવાનું રહેશે.