૧૭ સપ્ટેમ્બરથી ભાજપ શરૂ કરશે સેવા સંકલ્પ અભિયાન વારાણસીથી વડનગર સુધી યાત્રા કાઢશે
અભિયાનના ભાગરૂપે જન્મભૂમિથી કર્મભૂમિ યાત્રા પણ કાઢવામાં આવશેઃ વડાપ્રધાન નરેન્દ્ર મોદીના જન્મસ્થળ વડનગર અને તેમની કર્મભૂમિ ગણાતા વારાણસીમાંથી અલગ-અલગ ટીમો યાત્રા માટે રવાના થશે
ભારતીય જનતા પાર્ટી (BJP) ૧૭ સપ્ટેમ્બરથી સેવા સંકલ્પ અભિયાન શરૂ કરવા જઈ રહી છે. વડાપ્રધાન નરેન્દ્ર મોદીના જન્મદિવસ અને તેમના જાહેર જીવનના ૨૫ વર્ષ પૂર્ણ થવાના અવસરને ધ્યાનમાં રાખીને આ એક મહિનાનું અભિયાન યોજાશે. ૧૭ સપ્ટેમ્બરથી શરૂ થનાર આ અભિયાન ૧૭ ઓક્ટોબર સુધી ચાલશે. ભાજપે વડાપ્રધાનના જન્મદિવસને સેવા અને જનકલ્યાણ સાથે જોડીને વિવિધ કાર્યક્રમોનું આયોજન કર્યું છે.
ટીમો દેશના વિવિધ વિસ્તારોમાં પહોંચીને લોકો સાથે જનસંપર્ક કરશે અભિયાનના ભાગરૂપે જન્મભૂમિથી કર્મભૂમિ યાત્રા પણ કાઢવામાં આવશે. વડાપ્રધાન નરેન્દ્ર મોદીના જન્મસ્થળ વાડનગર અને તેમની કર્મભૂમિ ગણાતા વારાણસીમાંથી અલગ-અલગ ટીમો યાત્રા માટે રવાના થશે. આ ટીમો દેશના વિવિધ વિસ્તારોમાં પહોંચીને લોકો સાથે જનસંપર્ક કરશે અને સરકારની યોજનાઓ તથા જનકલ્યાણના કાર્યો અંગે માહિતી આપશે.
ભાજપ દ્વારા યાત્રા દરમિયાન ઉત્તર-દક્ષિણ અને પૂર્વ-પﾍમિ દિશામાં રેલીઓ તથા વિવિધ કાર્યક્રમોનું પણ આયોજન કરવામાં આવી રહ્યું છે. દેશના અલગ-અલગ શહેરો અને વિસ્તારોમાં વડાપ્રધાન નરેન્દ્ર મોદીના જીવન અને તેમના જાહેર જીવન સાથે જોડાયેલા પ્રસંગો પર વ્યાખ્યાનોનું આયોજન કરવામાં આવશે. આ કાર્યક્રમો દ્વારા લોકો સુધી વડાપ્રધાનની જીવનયાત્રા અને જાહેર સેવાના વિવિધ પાસા પહોંચાડવાનો પ્રયાસ કરવામાં આવશે.
સેવા સંકલ્પ અભિયાન દરમિયાન સમાજના વિવિધ વર્ગોને જોડવા માટે ખાસ કાર્યક્રમો પણ યોજાશે. આંગણવાડી કાર્યકરોના સન્માન સાથે આરોગ્ય અને સ્વચ્છતા સંબંધિત કાર્યક્રમો યોજાશે. સરકારી યોજનાઓના લાભાર્થીઓ માટે વિશેષ કેમ્પનું આયોજન કરવામાં આવશે, જેથી લોકોને સરકારી યોજનાઓનો લાભ મેળવવામાં સરળતા રહે.
યુવાનો સાથે જોડાણ વધારવા માટે પણ ભાજપે ખાસ ફોકસ રાખ્યો છે. યુવાનોને અભિયાન સાથે જોડીને વિવિધ પ્રવૃત્તિઓનું આયોજન કરવામાં આવશે. પક્ષનો ઉદ્દેશ વડાપ્રધાન મોદીના જન્મદિવસને માત્ર ઉજવણી પૂરતો મર્યાદિત ન રાખીને તેને સેવા, જનસંપર્ક અને જનકલ્યાણની પ્રવૃત્તિઓ સાથે જોડવાનો છે.
૧૭ સપ્ટેમ્બરથી શરૂ થનારા આ અભિયાન દરમિયાન દેશભરમાં વિવિધ સ્તરે કાર્યક્રમો યોજાશે. 'જન્મભૂમિથી કર્મભૂમિ યાત્રા'ને અભિયાનના મુખ્ય આકર્ષણોમાંથી એક માનવામાં આવી રહી છે, જેના માધ્યમથી વાડનગરથી વારાણસી સુધી વડાપ્રધાન મોદીની જાહેર જીવનની સફર સાથે જોડાયેલા સંદેશને દેશના વિવિધ વિસ્તારો સુધી પહોંચાડવામાં આવશે.
(10:06 AM IST)
છેલ્લા 8 દિવસમાં સૌથી લોકપ્રિય 
