હવાના, તા.15: આફ્રિકાના દેશ ક્યુબામાં અત્યારે સ્થિતિ અત્યંત સ્ફોટક અને હૃદયદ્રાવક બની ગઈ છે. દેશમાં ઈંધણનો ભંડાર (Fuel Stock) સત્તાવાર રીતે શૂન્ય થઈ ગયો છે. પેટ્રોલ અને ડીઝલની તીવ્ર અછતના કારણે દેશનું અર્થતંત્ર થંભી ગયું છે અને રાજધાની હવાના સહિત આખું રાષ્ટ્ર અંધકારમાં ડૂબી ગયું છે. ઉર્જા પ્રધાન વિસેન્ટ ડી લા ઓ-એ સ્વીકાર્યું છે કે દેશ પાસે હવે ઈંધણ તેલનો એક પણ હિસ્સો બચ્યો નથી.
 
નરક જેવી સ્થિતિ: વીજળી વગરના દિવસો
ક્યુબાના નાગરિકો અત્યારે નરક જેવી સ્થિતિનો સામનો કરી રહ્યા છે. દેશના પાવર ગ્રિડ સંપૂર્ણપણે નિષ્ફળ સાબિત થઈ રહ્યા છે, જેના કારણે લોકોને દિવસમાં 20 થી 22 કલાક વીજળી વગર રહેવું પડે છે. આ માત્ર વીજળીની સમસ્યા નથી, પરંતુ તેના કારણે પાણીનો પુરવઠો, હોસ્પિટલો અને જીવનજરૂરી ચીજવસ્તુઓના વિતરણ પર પણ ગંભીર અસર પડી છે. ખાદ્ય ચીજવસ્તુઓ અને દવાઓના ભાવ આસમાને પહોંચતા સામાન્ય જનતાનો પારો ગરમાયો છે.
ડોનાલ્ડ ટ્રમ્પના આદેશની ઘાતક અસર
ક્યુબાની આ સ્થિતિ પાછળ આંતરરાષ્ટ્રીય રાજકારણ પણ જવાબદાર છે. જાન્યુઆરી 2026માં અમેરિકાના રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા નવા પ્રતિબંધો અને આદેશો બાદ, ક્યુબાને તેલ પૂરો પાડતા મુખ્ય દેશો મેક્સિકો અને વેનેઝુએલાએ સપ્લાય બંધ કરી દીધો છે. અમેરિકાના આર્થિક પ્રતિબંધોએ ક્યુબાના વિદેશી હૂંડિયામણના ભંડારને સાફ કરી નાખ્યો છે, જેથી હવે કોઈ દેશ તેને ઉધારમાં તેલ આપવા તૈયાર નથી.
સોલર એનર્જી પણ નિષ્ફળ
સરકારે છેલ્લા બે વર્ષમાં આશરે 1,300 મેગાવોટ સોલર પાવર ક્ષમતા ઊભી કરી હતી, પરંતુ પાવર ગ્રિડ એટલા જૂના અને અસ્થિર છે કે તે આ સૌર ઉર્જાને સહન કરી શકતા નથી. ઈંધણની અછતને કારણે થર્મલ પાવર પ્લાન્ટ્સ બંધ થઈ રહ્યા છે અને ગ્રીડ વારંવાર ફેઈલ થઈ રહ્યા છે. ક્યુબા સરકારે જાહેરાત કરી છે કે જે પણ દેશ તેમને ઈંધણ આપશે તેની સાથે તેઓ સોદો કરવા તૈયાર છે, પરંતુ ખાલી તિજોરીને કારણે આશા ઓછી છે.
 
મુખ્ય અંશો:
•    ઝીરો સ્ટોક: દેશમાં ડીઝલ અને ફ્યુઅલ ઓઈલનો જથ્થો શૂન્ય.
•    અંધારપટ: રાજધાની હવાનામાં રોજ 22 કલાકનો પાવર કટ.
•    મોંઘવારી: ખોરાક અને દવાઓ સામાન્ય લોકોની પહોંચ બહાર.
•    રાજકીય કારણ: અમેરિકાના પ્રતિબંધોને કારણે મેક્સિકો-વેનેઝુએલાએ મદદ ખેંચી લીધી.
દાયકાઓના સૌથી મોટા ઉર્જા સંકટનો સામનો કરી રહેલા ક્યુબામાં હવે આગામી દિવસોમાં માનવીય કટોકટી વધુ ઘેરી બને તેવા એંધાણ દેખાઈ રહ્યા છે.