કોલકાતા: પશ્ચિમ બંગાળના દક્ષિણ ૨૪ પરગણા જિલ્લાના ફાલ્ટા વિસ્તારમાં શનિવારે ભારેલા અગ્નિ જેવી સ્થિતિ જોવા મળી હતી. મતગણતરી પછી સુરક્ષાની માંગ સાથે સેંકડો ગ્રામજનોએ હસીમનગર ગામમાં રસ્તા રોકીને ઉગ્ર વિરોધ પ્રદર્શન કર્યું હતું. પ્રદર્શનકારીઓમાં મોટી સંખ્યામાં મહિલાઓનો સમાવેશ થતો હતો, જેમણે હાથમાં ભાજપના ઝંડા લઈને સ્થાનિક TMC નેતાઓ વિરુદ્ધ સૂત્રોચ્ચાર કર્યા હતા.
ગંભીર ધમકીઓના આક્ષેપ
ભાજપના મહિલા મોરચાના કાર્યકર ફાતિમા બીબીએ ગંભીર આક્ષેપ કરતા જણાવ્યું હતું કે, સ્થાનિક પંચાયત પ્રધાન ઈસરાફિલ અને તેના માણસો ૩૦ એપ્રિલથી સતત ધમકીઓ આપી રહ્યા છે. પ્રદર્શનકારીઓનો દાવો છે કે તેમને કહેવામાં આવ્યું છે કે ૫ મે ના રોજ ચૂંટણીના પરિણામો જાહેર થયા બાદ વિસ્તારમાં લોહી વહેવડાવવામાં આવશે. આ ભયને કારણે ગ્રામજનોએ માંગ કરી છે કે વિસ્તારમાં CRPF ની ટુકડીઓને તૈનાત રાખવામાં આવે જેથી તેમની સુરક્ષા જળવાઈ રહે.
TMC એ આરોપોને નકાર્યા
બીજી તરફ, TMC ઉમેદવાર જહાંગીર ખાને આ તમામ આરોપોને પાયાવિહોણા ગણાવ્યા છે. તેમણે વળતો આક્ષેપ કર્યો હતો કે, ભાજપે જાણીજોઈને મહિલાઓને આગળ કરી છે જેથી TMC કાર્યકરોની ધરપકડ કરાવી શકાય અને તેમના ટેકેદારોનું મનોબળ તોડી શકાય. ખાને વધુમાં ઉમેર્યું હતું કે જો તેમના પર લાગેલા આરોપો સાબિત થશે તો તેઓ કાયદાકીય કાર્યવાહીનો સામનો કરવા તૈયાર છે.
તંત્ર દ્વારા સુરક્ષાનું આશ્વાસન
ઘટનાની ગંભીરતાને જોતા CRPF ના ડેપ્યુટી કમાન્ડન્ટ વિશાળ પોલીસ કાફલા સાથે ઘટનાસ્થળે દોડી આવ્યા હતા. તેમણે ગ્રામજનોને ખાતરી આપી હતી કે સ્થાનિક પોલીસના સહયોગથી તેમની પૂર્ણ સુરક્ષા સુનિશ્ચિત કરવામાં આવશે અને કોઈએ ડરવાની જરૂર નથી. દરમિયાન, ચૂંટણી પંચના અધિકારીએ પણ આ વિરોધ પ્રદર્શન અંગે જિલ્લા વહીવટીતંત્ર પાસે વિગતવાર અહેવાલ માંગ્યો છે.