લંડન : વિશ્વના રાજકારણમાંથી આ સમયના સૌથી મોટા સમાચાર બ્રિટન (UK) થી આવી રહ્યા છે. પદ છોડવાની સત્તાવાર જાહેરાત કર્યા બાદ બ્રિટનના વિદાય લેતા વડાપ્રધાન કીર સ્ટાર્મરે એક ચોંકાવનારા ઇન્ટરવ્યુમાં દાવો કર્યો છે કે, આગામી સામાન્ય ચૂંટણીમાં પણ તેમની જ લેબર પાર્ટી ભવ્ય વિજય મેળવશે. તેમના સંભવિત ઉત્તરાધિકારી એન્ડી બર્નહામનો મજબૂત બચાવ કરતા સ્ટાર્મરે જણાવ્યું હતું કે, તેમની સરકારે છેલ્લા બે વર્ષમાં દેશ હિતમાં એટલા નક્કર અને ઐતિહાસિક કામો કર્યા છે કે જેના કારણે આગામી નેતા માટે સત્તાનો માર્ગ એકદમ સરળ બની ગયો છે. રાજીનામાની જાહેરાત બાદ આપેલા આ પ્રથમ ઇન્ટરવ્યુથી વૈશ્વિક રાજકીય વર્તુળોમાં ભારે ચર્ચા જાગી છે.

બાળ ગરીબી અને NHS સંકટ પર મેળવેલી જીત પર ગર્વ

બીબીસી (BBC) ને આપેલા વિશેષ ઇન્ટરવ્યુમાં કીર સ્ટાર્મરે વડાપ્રધાન તરીકે પોતાના કાર્યકાળની પ્રચંડ સિદ્ધિઓ ગણાવી હતી. તેમણે કહ્યું કે, ૨૦૨૪ ની સામાન્ય ચૂંટણીમાં લેબર પાર્ટીને મળેલી ઐતિહાસિક જીત દેશના પુનર્નિર્માણની શરૂઆત હતી. બ્રિટનમાં બાળ ગરીબી નાબૂદ કરવા, નેશનલ હેલ્થ સર્વિસ (NHS) ની લાંબી વેઇટિંગ લિસ્ટ ઘટાડવા અને યુકેના આર્થિક સંકટને સ્થિર કરવા માટે તેમની સરકારે રાત-દિવસ કામ કર્યું છે. ૨૦૧૯ ની કારમી હાર બાદ પાર્ટીની અંદર વ્યાપેલી યહૂદી વિરોધીતા (Anti-Semitism) ને ખતમ કરીને સંરક્ષણ અને ઇમિગ્રેશન જેવા સંવેદનશીલ મુદ્દાઓ પર જનતાનો વિશ્વાસ ફરી જીતવો એ તેમની સૌથી મોટી ઉપલબ્ધિ છે.

'આ મારી રાજકીય યાત્રાનો અંત છે, સાથીદારોનો નહીં'

સ્ટાર્મરે અત્યંત ભાવુક થતાં સ્પષ્ટ કર્યું કે, "આ પ્રકરણ સાથે રાજકારણમાં મારી વ્યક્તિગત યાત્રાનો સત્તાવાર અંત આવી ગયો છે. પરંતુ મારા સાથીદારો અને નવી સરકાર માટે આ એક નવી પ્રગતિશીલ શરૂઆત છે." એન્ડી બર્નહામ સાથેના કથિત વ્યક્તિગત મતભેદોના અહેવાલોને હસાવતા ફગાવી દઈને તેમણે મજાકમાં કહ્યું કે, "બર્નહામનો એકમાત્ર દોષ એ છે કે તે એવર્ટન ફૂટબોલ ક્લબને સપોર્ટ કરે છે! બાકી અમારી વચ્ચે કોઈ દુશ્મનાવટ નથી અને જો તેઓ પીએમ બનશે તો મારો સંપૂર્ણ ટેકો રહેશે."

'નેવર હીયર કીર' ના ઉપનામ પર આપ્યો સણસણતો જવાબ

પોતાના કાર્યકાળ દરમિયાન બ્રિટન કરતાં વિદેશી બાબતો અને આંતરરાષ્ટ્રીય પ્રવાસો પર વધુ સમય વિતાવવા બદલ વિપક્ષો દ્વારા સ્ટાર્મરને 'નેવર હીયર કીર' (બ્રિટનમાં ક્યારેય ન દેખાતા કીર) નું ટોણો મારતું ઉપનામ અપાયું હતું. આ આકરી ટીકાનો જવાબ આપતા તેમણે કહ્યું કે, "આજના આધુનિક યુગમાં કોઈ પણ વૈશ્વિક નેતા સ્થાનિક અને આંતરરાષ્ટ્રીય મુદ્દાઓને અલગ ચશ્માથી ન જોઈ શકે. બંને એકબીજા સાથે જોડાયેલા છે."

સ્ટાર્મરે નાટો (NATO) ના સેક્રેટરી જનરલ બનવાની અટકળોને સદંતર ફગાવી દીધી છે અને કહ્યું છે કે તેઓ આગામી ચૂંટણી સુધી માત્ર સાંસદ તરીકે સેવા આપશે. ડાઉનિંગ સ્ટ્રીટ (પીએમ આવાસ) છોડ્યા બાદ ભવિષ્યના પ્લાન અંગે તેમણે કહ્યું કે, હાલ ૧૦૦ ટકા ધ્યાન દેશની સેવા પર છે. આ મોટો અને અંગત નિર્ણય તેમણે ચેકર્સ ખાતેના સત્તાવાર નિવાસસ્થાને પોતાના પરિવાર સાથે સપ્તાહના અંતે લાંબી ચર્ચા કર્યા બાદ લીધો હોવાનું સ્વીકાર્યું હતું.