તિરુવનંતપુરમ :  શાળાએ જતા નાના બાળકોના દફતરના ભારેખમ વજન અને તેનાથી સ્વાસ્થ્ય પર પડતી ગંભીર અસરો અંગે ચિંતા વ્યક્ત કરીને કેરળ સરકારે એક અત્યંત પ્રશંસનીય અને રાહતરૂપ પગલું ભરવાની તૈયારી હાથ ધરી છે. વિદ્યાર્થીઓ પરથી શૈક્ષણિક બોજ ઓછો કરવા માટે રાજ્ય સરકાર દ્વારા માસિક અથવા અર્ધવાર્ષિક ધોરણે અલગ-અલગ ભાગમાં પાઠ્યપુસ્તકો છાપવા માટે વિચારણા કરવામાં આવી રહી છે. આ અંગે આગામી 24 નવેમ્બરના રોજ રાજ્યના શિક્ષણ વિભાગ દ્વારા એક મહત્વપૂર્ણ બેઠક બોલાવવામાં આવી છે, જેમાં સ્કૂલ બેગનું વજન ઘટાડવાના રોડમેપ અને તેને અમલમાં મૂકવાની વિવિધ રીતો પર વિસ્તૃત ચર્ચા-વિચારણા કરવામાં આવશે.

કેરળના સામાન્ય શિક્ષણ મંત્રી એન. શમસુદ્દીને વિધાનસભામાં આ અંગે વિગતો આપતા જણાવ્યું હતું કે વિદ્યાર્થીઓ અને વાલીઓની લાંબા સમયની આ માગણી પ્રત્યે સરકાર અત્યંત સંવેદનશીલ છે. સીપીઆઈ (CPI) ના ધારાસભ્ય કે. કે. વલસરાજ દ્વારા રજૂ કરવામાં આવેલી રજૂઆતનો જવાબ આપતા મંત્રીએ સ્પષ્ટ કર્યું હતું કે પાઠ્યપુસ્તકોના છાપકામ અને વિતરણની પ્રક્રિયામાં આ Radical ફેરફાર લાવવાનો પ્રસ્તાવ છે. આ યોજના હેઠળ આખા વર્ષનું એક જ જાડું પુસ્તક આપવાને બદલે માત્ર મહિના કે છ મહિનાના અભ્યાસક્રમ મુજબના પાતળા પુસ્તકો છાપવામાં આવશે. આ સિવાય પુસ્તકોના છાપકામમાં હળવા વજનના ક્વોલિટી કાગળનો ઉપયોગ કરવાની શક્યતાઓ પણ ચકાસવામાં આવી રહી છે.

રાષ્ટ્રીય શિક્ષણ નીતિ 2020 અને શિક્ષણ મંત્રાલયની માર્ગદર્શિકા મુજબ, સ્કૂલ બેગનું વજન બાળકના કુલ શરીરના વજનના 10% થી વધુ ન હોવું જોઈએ. દાખલા તરીકે, જો કોઈ બાળકના શરીરનું વજન 30 કિલો હોય, તો તેના દફતરનું વજન કોઈ પણ સંજોગોમાં 3 કિલોથી વધવું જોઈએ નહીં. આ નિયમોનું પાલન કરાવવા માટે કેન્દ્ર સરકારે શાળાઓમાં 'બેગલેસ ડે' યોજવા અને શાળાઓમાં વજન કાંટા રાખવાના નિર્દેશો પણ જારી કર્યા છે. કેરળ સરકારના આ નવા અભિગમથી અન્ય રાજ્યો માટે પણ એક સકારાત્મક ઉદાહરણ પૂરું પડશે અને લાખો માસૂમ બાળકોને પીઠના દુખાવા અને અતિશય શારીરિક થાકમાંથી કાયમી મુક્તિ મળશે.