નવી દિલ્હી: ભારત હાલમાં ગ્લોબલ વોર્મિંગ અને ક્લાઈમેટ ચેન્જની સૌથી ભયાનક અસરનો સામનો કરી રહ્યું છે. એક ચોંકાવનારા અહેવાલ મુજબ, વિશ્વના ૨૦ સૌથી ગરમ શહેરોની યાદીમાં ૧૯ શહેરો માત્ર ભારતના છે, જે દર્શાવે છે કે દેશનો મોટો હિસ્સો અત્યારે 'હીટ વેવ'ની ચુંગાલમાં છે. બિહારનું ભાગલપુર, ઓડિશાનું તાલચર અને પશ્ચિમ બંગાળનું આસનસોલ આ યાદીમાં સૌથી મોખરે છે, જ્યાં પારો ૪૪ ડિગ્રી સેલ્સિયસને પાર કરી ગયો છે. આશ્ચર્યની વાત એ છે કે ભારતની બહાર માત્ર નેપાળનું લુમ્બિની જ આ યાદીમાં સ્થાન પામ્યું છે, બાકી આખું લિસ્ટ ભારતીય શહેરોથી ભરેલું છે, જે પર્યાવરણ પ્રેમીઓ માટે ચિંતાનો વિષય છે.

ખાસ કરીને પૂર્વ ભારત ગરમીનું મુખ્ય કેન્દ્ર બની ગયું છે. બિહારના બેગુસરાય, મોતીહારી, સિવાન અને જમુઈ જેવા વિસ્તારોમાં તાપમાન સતત ૪૩ ડિગ્રીની આસપાસ રહેતા બપોરના સમયે રસ્તાઓ સુમસામ ભાસી રહ્યા છે. ઉત્તર પ્રદેશના બલિયામાં પણ ગરમ પવનોએ લોકોની હાલત કફોડી કરી દીધી છે. હવામાન વિભાગના મતે, આ માત્ર સામાન્ય ઉનાળો નથી પરંતુ એક તીવ્ર કુદરતી આફત જેવી સ્થિતિ છે. બંગાળના માલદા અને બાંકુરામાં પણ સૂર્યદેવ જાણે અગનગોળા વરસાવી રહ્યા હોય તેમ ગરમીએ પાછલા તમામ રેકોર્ડ તોડી નાખ્યા છે, જેના કારણે હોસ્પિટલોમાં પણ ગરમીને લગતી બીમારીઓના દર્દીઓની સંખ્યામાં વધારો જોવા મળી રહ્યો છે.

આ ગંભીર સ્થિતિને જોતા સ્થાનિક વહીવટીતંત્રે લોકોને બપોરના સમયે બિનજરૂરી બહાર ન નીકળવાની અને પુષ્કળ પાણી પીવાની સલાહ આપી છે. ખેતીવાડી પર પણ આ ગરમીની માઠી અસર પડવાની શક્યતા છે. જ્યારે પશ્ચિમ અને દક્ષિણ ભારતમાં પણ ધીમે ધીમે પારો ચઢી રહ્યો છે, ત્યારે પૂર્વના આ ૧૯ શહેરોની સ્થિતિએ સમગ્ર વિશ્વનું ધ્યાન ખેંચ્યું છે. નિષ્ણાતો માને છે કે જો વૃક્ષોનું પ્રમાણ વધારવામાં નહીં આવે અને શહેરીકરણ પર અંકુશ નહીં મુકાય, તો આગામી વર્ષોમાં આ આંકડો હજુ પણ વધુ ભયાનક બની શકે છે.