નવી દિલ્હી : હોર્મુઝની સામુદ્રધુનીમાં ઓમાનના અલ-ખસબ બંદરથી આશરે ૨૦ નોટિકલ માઇલ ઉત્તર-પૂર્વમાં પસાર થઈ રહેલા માલવાહક જહાજ ઉપર હુમલો કરવામાં આવ્યો હતો. હુમલા બાદ જહાજના એન્જિન રૂમમાં નુકસાન થતાં વીજળી સંપૂર્ણ બંધ થઈ ગઈ હતી અને  આગ ફાટી નીકળી હતી. જહાજમાંથી મદદ માટે તાત્કાલિક સંદેશો પ્રસારિત કરવામાં આવ્યો હતો.

મેરિટાઇમ સુરક્ષા સૂત્રોએ હુમલાગ્રસ્ત જહાજની ઓળખ લાઇબેરિયાના ધ્વજ હેઠળ ચાલતા ‘મિનોઅન પાયોનિયર’ તરીકે કરી છે. આ સૂકા માલનું પરિવહન કરતું જહાજ ગ્રીક હિતો સાથે સંકળાયેલું હોવાનું જણાવાયું છે. આગ બેકાબૂ બનતાં નાવિકોએ જહાજ છોડવું પડ્યું હતું, જ્યારે ત્રીજા એન્જિનિયરનો હજુ સુધી પત્તો લાગ્યો નથી. હુમલાની જવાબદારી કોઈ સંગઠન કે દેશે સત્તાવાર રીતે સ્વીકારી નથી. 

બ્રિટનની મેરિટાઇમ ટ્રેડ ઓપરેશન્સ એજન્સીના જણાવ્યા પ્રમાણે ઘટના ત્રીજી ઓગસ્ટે રાત્રે ૧૦ વાગ્યે વિશ્વ સમય મુજબ બની હતી. એટલે કે ઓમાનમાં ચોથી ઓગસ્ટે રાત્રે ૨ વાગ્યે અને ભારતમાં ચોથી ઓગસ્ટે વહેલી સવારે આશરે સાડા ત્રણ વાગ્યે હુમલો થયો હતો. 

યમન નજીક લાલ સમુદ્રમાં હુમલાગ્રસ્ત ભારતીય જહાજમાંથી ૧૩ ભારતીયો સહિત ૧૪ લોકોને બચાવવામાં આવ્યા હતા તે અલગ ઘટના હતી. તે જહાજ ‘ફૈઝે નૂરે ઓલિયા’ હતું અને તેનો હોર્મુઝમાં હુમલાગ્રસ્ત ‘મિનોઅન પાયોનિયર’ સાથે કોઈ સંબંધ નથી.