કોલકાતા : પશ્ચિમ બંગાળમાં વિધાનસભા ચૂંટણીના છેલ્લા તબક્કાનો પ્રચાર ચરમસીમાએ છે ત્યારે કેન્દ્રીય ગૃહમંત્રી અમિતભાઈ શાહે સુરક્ષા વ્યવસ્થાને લઈને એક મહત્વપૂર્ણ નિવેદન આપ્યું છે. સોમવારે કોલકાતાના બેહાલા ખાતે એક વિશાળ રોડ શોને સંબોધતા શાહે સ્પષ્ટ કર્યું હતું કે, રાજ્યમાં શાંતિ જાળવી રાખવા માટે વિધાનસભાની ચૂંટણી પૂર્ણ થયા પછી પણ ઓછામાં ઓછા સાત દિવસ સુધી કેન્દ્રીય સુરક્ષા દળો તૈનાત રહેશે.
બેહાલામાં કેસરીયો માહોલ
૨૯ એપ્રિલના રોજ યોજાનાર બીજા અને અંતિમ તબક્કાના મતદાન પૂર્વે ભાજપના ઉમેદવારોના સમર્થનમાં અમિતભાઈ શાહે બેહાલામાં શક્તિ પ્રદર્શન કર્યું હતું. હજારોની સંખ્યામાં ઉમટી પડેલા કાર્યકરો અને સમર્થકો વચ્ચે ગૃહમંત્રીએ વિશ્વાસ વ્યક્ત કર્યો હતો કે બંગાળમાં પરિવર્તન નક્કી છે. તેમણે ભારપૂર્વક જણાવ્યું હતું કે ચૂંટણી પછી થતી હિંસાને રોકવા માટે કેન્દ્ર સરકાર કટિબદ્ધ છે, અને તેથી જ સુરક્ષા દળોને તુરંત પાછા ખેંચવામાં આવશે નહીં.
ચૂંટણીનું ગણિત અને પરિણામ
પશ્ચિમ બંગાળની ૨૯૪ બેઠકોવાળી વિધાનસભા માટે પ્રથમ તબક્કાનું મતદાન ૨૩ એપ્રિલના રોજ યોજાયું હતું. હવે બાકીની બેઠકો માટે ૨૯ એપ્રિલે રણસંગ્રામ ખેલાશે. રાજ્યમાં હિંસા મુક્ત વાતાવરણમાં મતગણતરી થાય તે સુનિશ્ચિત કરવા માટે ચૂંટણી પંચ અને ગૃહ મંત્રાલય સતર્ક છે. આ તમામ બેઠકોના પરિણામો ૪ મેના રોજ જાહેર કરવામાં આવશે.
અમિતભાઈ શાહના આ નિવેદનથી વિપક્ષોમાં પણ ચર્ચાઓ શરૂ થઈ છે. ખાસ કરીને સંવેદનશીલ વિસ્તારોમાં જ્યાં ચૂંટણી પછી હિંસાની આશંકા વધુ હોય છે, ત્યાં કેન્દ્રીય દળોની હાજરી સામાન્ય નાગરિકો માટે આશ્વાસનરૂપ બની શકે છે. હવે ૪ મેના રોજ બંગાળની જનતા કોના શિરે તાજ પહેરાવે છે તેના પર સમગ્ર દેશની નજર છે.