મુંબઈ : દિલ્હી બાદ હવે મુંબઈમાં પણ 'કોકરોચ જનતા પાર્ટી' (CJP) ના સમર્થનમાં વિરોધ પ્રદર્શનો શરૂ થઈ ગયા છે. મુખ્ય ચૂંટણી કમિશનર જ્ઞાનેશ કુમારના રાજીનામાની માંગ અને મતદાર યાદીમાં કથિત અનિયમિતતાઓને લઈને મુંબઈના ઐતિહાસિક ઓગસ્ટ ક્રાંતિ મેદાન ખાતે યોજાયેલા વિરોધ પ્રદર્શન દરમિયાન મુંબઈ પોલીસે બોલિવૂડ અભિનેતા ઈમરાન ખાન, આમિર ખાનની ભત્રીજી અને અભિનેત્રી ઝૈન મેરી ખાન તેમજ લેખા વોશિંગ્ટન સહિત અનેક પ્રદર્શનકારીઓની અટકાયત કરી હતી.

પ્રાપ્ત વિગતો મુજબ, દિલ્હીમાં ચાલી રહેલા આંદોલનના સમર્થનમાં મુંબઈમાં પણ નાગરિકો અને કલાકારો એકઠા થયા હતા. અટકાયત કરવામાં આવ્યા બાદ પણ અભિનેત્રી ઝૈન મેરી ખાને સોશિયલ મીડિયાનો સહારો લઈને પોતાના ફોલોઅર્સને આશ્વાસન આપ્યું હતું. તેણે એક વીડિયો અને પોસ્ટ શેર કરીને જણાવ્યું હતું કે તે પોલીસકર્મીઓને જલિયાંવાલા બાગ અને નાઝી જર્મનીના ઇતિહાસ વિશે સમજાવી રહી છે અને યાદ અપાવી રહી છે કે તેમની ફરજ દેશ પ્રત્યે છે. થોડા સમયની કસ્ટડી બાદ પોલીસે ઈમરાન ખાન, ઝૈન મેરી ખાન અને લેખા વોશિંગ્ટનને મુક્ત કરી દીધા હતા.

અટકાયત પહેલા મીડિયા સાથે વાત કરતા અભિનેતા ઈમરાન ખાને સ્પષ્ટ કર્યું હતું કે તેઓ કોઈ ચોક્કસ માંગણીઓ સાથે નહીં પરંતુ એક સામાન્ય નાગરિક તરીકે આ શહેરમાં આવ્યા છે. તેમણે સવાલ ઉઠાવ્યો હતો કે નાગરિકોની હિલચાલની સ્વતંત્રતા પર કેમ પ્રતિબંધ મૂકવામાં આવી રહ્યો છે અને તેમના અવાજને કેમ દબાવવામાં આવી રહ્યો છે. તેઓ કોઈપણ રાજકીય સંગઠન કે પક્ષનો ભાગ નથી પરંતુ માત્ર એક પ્રતિનિધિ તરીકે હાજર રહ્યા હોવાનું તેમણે જણાવ્યું હતું.

આ સમગ્ર વિરોધ પ્રદર્શન પાછળનું મુખ્ય કારણ ચૂંટણી પંચ દ્વારા મતદાર યાદીઓની 'સ્પેશિયલ ઇન્ટેન્સિવ રિવિઝન' (SIR) પ્રક્રિયા અને નવા મતદારોની નોંધણી માટે વપરાતા 'ફોર્મ-6' માં કરવામાં આવેલા ફેરફારો સામેનો રોષ છે. વિરોધ પક્ષો અને સંગઠનોનો આરોપ છે કે પાત્ર મતદારોના નામ જાણીજોઈને યાદીમાંથી દૂર કરવામાં આવી રહ્યા છે, જેના વિરોધમાં આ અભિયાન ચલાવવામાં આવી રહ્યું છે. મુંબઈમાં થયેલી આ અટકાયતો અને કલાકારોની સંડોવણીને કારણે આ મુદ્દો વધુ ચર્ચામાં આવ્યો છે.