સાન જુઆન : મિસ યુનિવર્સ ૨૦૨૬ ની ૭૫મી ગ્રાન્ડ આવૃત્તિ સત્તાવાર રીતે શરૂ થઈ ચૂકી છે અને વિશ્વભરની સુંદરીઓ પ્યુઅર્ટો રિકોના સાન જુઆન સ્થિત 'જોસ મિગ્યુએલ એગ્રેલોટ કોલિઝિયમ' ખાતે ફાઈનલ પહેલાંના રાઉન્ડમાં ભાગ લઈ રહી છે. જોકે આ આંતરરાષ્ટ્રીય સ્પર્ધાની ઝાકઝમાળ વચ્ચે અચાનક વિવાદો સર્જાતાં ૧૫ દેશો સ્પર્ધામાંથી બહાર થઈ ગયા છે. વિઝા સંબંધિત સમસ્યાઓ, ફ્રેન્ચાઈઝી વિવાદો અને અંગત કારણોસર આટલી મોટી સંખ્યામાં દેશો ખસી જતાં વૈશ્વિક સ્તરે ચર્ચા જાગી છે.

અંગત મૂલ્યો અને શારીરિક-માનસિક સ્વાસ્થ્યને પ્રાધાન્ય આપીને મિસ યુનિવર્સ ઓસ્ટ્રિયા વિક્ટોરિયા એમેરસને પોતાનું નામ પાછું ખેંચ્યું છે. બીજી તરફ, મિસ યુનિવર્સ બલ્ગેરિયા એના-મારિયા કાર અકસ્માતમાં ગંભીર રીતે ઘાયલ થતાં આયોજકોએ તેમના સ્વાસ્થ્યને સર્વોચ્ચ પ્રાથમિકતા આપી સ્પર્ધામાંથી મુક્ત કર્યા છે. આ ઉપરાંત સેન્ટ માર્ટિનની મેડલી મેરિયન, માલદીવ્સની અમીનાથ યુઈન મોહમ્મદ અને મોરોક્કોની સારા અલ્લાલીએ પણ વ્યક્તિગત કે અજ્ઞાત કારણોસર આ વૈશ્વિક મંચ છોડવાની જાહેરાત કરી દીધી છે.

એશિયાઈ ક્ષેત્રમાં ફ્રેન્ચાઈઝી અને કોર્પોરેટ વિવાદોને કારણે થાઈલેન્ડ, ઈન્ડોનેશિયા, વિયેતનામ, લાઓસ, સિંગાપોર અને મલેશિયા જેવા ૬ મુખ્ય દેશો આ આવૃત્તિમાંથી બહાર થઈ ગયા છે, જોકે આ સ્પર્ધકો પોતાના ટાઈટલ જાળવી રાખશે. આ સિવાય નેપાળ, અંગોલા, ઝામ્બિયા, ઝિમ્બાબ્વે અને રિપબ્લિક ઓફ ધ કોંગો જેવા દેશો યુએસ વિઝા પ્રતિબંધો અને પ્રોસેસિંગની સમસ્યાઓને કારણે પ્યુઅર્ટો રિકો પહોંચી શક્યા નથી, જેના પરિણામે સ્પર્ધાનું ભૌગોલિક સમીકરણ બદલાયું છે.

આટલા મોટા પાયે દેશોના બહિષ્કાર અને ગેરહાજરી બાદ આયોજકો હવે આગામી તબક્કાની વ્યવસ્થાઓ સુચારૂ કરવા મથી રહ્યા છે. એક તરફ વિયેતનામ ભલે આ વર્ષે સ્પર્ધાથી દૂર રહ્યું પરંતુ તે આગામી ૭૬મી મિસ યુનિવર્સ સ્પર્ધાનું આયોજન કરશે, જ્યારે હાલની ૭૫મી આવૃત્તિમાં ઘટેલા સ્પર્ધકો વચ્ચે જ ગ્રાન્ડ ફાઈનલ યોજવા માટે કાનૂની અને આયોજન સ્તરની કામગીરી ઝડપથી પૂર્ણ કરવામાં આવી રહી છે.