નવી દિલ્હી તા.૨૦ : આંતરરાષ્ટ્રીય બજારમાં ક્રૂડ ઓઈલના ભાવમાં ફરી એકવાર મોટો ઉછાળો નોંધાયો છે. બ્રેન્ટ ક્રૂડનો ભાવ 90 ડૉલર પ્રતિ બેરલની સપાટીને પાર કરી ગયો છે.

છેલ્લા 20 દિવસમાં જ ક્રૂડમાં 20 ડૉલરનો વધારો થયો છે. ઓગસ્ટની શરૂઆતમાં જે ક્રૂડ 70 ડૉલરની આસપાસ હતું તે હવે 90 ડૉલરને પાર પહોંચી ગયું છે.

 ઓપેક+ દેશો દ્વારા ઉત્પાદનમાં કાપ ચાલુ રાખવાની જાહેરાતને કારણે બજારમાં સપ્લાયની ચિંતા વધી છે. મધ્ય પૂર્વમાં ચાલી રહેલા તણાવને કારણે રોકાણકારો સલામત રોકાણ તરફ વળ્યા છે. શિયાળાની સિઝન નજીક આવતા ઔદ્યોગિક અને હીટિંગની માંગ વધવાની શક્યતાએ પણ ભાવને ટેકો આપ્યો છે.

ક્રૂડ મોંઘુ થવાથી ભારતમાં પેટ્રોલ-ડીઝલ અને LPGના ભાવ પર સીધી અસર પડે છે. જો આ સ્તરે ક્રૂડ ટકે તો સરકારને ફ્યુઅલના ભાવ વધારવા પડી શકે છે. આનાથી મોંઘવારી પણ વધવાનો ભય છે કારણ કે પરિવહન ખર્ચ વધતા તમામ ચીજવસ્તુઓ મોંઘી થશે.

નિષ્ણાતોનું માનવું છે કે જો ઓપેક+ સપ્લાય નહીં વધારે તો ક્રૂડ 100 ડૉલર તરફ પણ જઈ શકે છે.