<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 15th November 2026

બંગાળની ખાડીમાં 'અકવાન' વાવાઝોડાનું સંકટ: IMD દ્વારા ભારે વરસાદ અને તોફાની પવનોની ચેતવણી જારી

​૧૬ નવેમ્બર સુધીમાં ચક્રવાતમાં પરિવર્તવાઈ શકે છે નવી સિસ્ટમ; માછીમારોને દરિયો ન ખેડવા ખાસ સૂચના

​નવી દિલ્હી: ​દેશના હવામાનમાં ફરી એકવાર મોટો પલટો જોવા મળી રહ્યો છે. ભારતીય હવામાન વિભાગ (IMD) દ્વારા બંગાળની ખાડીમાં સર્જાઈ રહેલી એક નવી હવામાન પ્રણાલીને લઈને ગંભીર ચેતવણી જારી કરવામાં આવી છે. અહેવાલો મુજબ, બંગાળની ખાડીમાં એક નવું ચક્રવાત ‘અકવાન’ (Cyclone Akvan) આકાર લઈ રહ્યું છે, જે આગામી ૪૮ કલાકમાં એટલે કે ૧૬ નવેમ્બરની સાંજ સુધીમાં ભીષણ ચક્રવાતી તોફાનમાં પરિવર્તિત થઈ શકે છે. આ વાવાઝોડાનું નામકરણ ઈરાન દ્વારા કરવામાં આવ્યું છે.

​સિસ્ટમની વર્તમાન સ્થિતિ અને ગતિ
​હવામાન વિભાગના જણાવ્યા અનુસાર, આ સિસ્ટમ ઉત્તર-પશ્ચિમ દિશા તરફ આગળ વધી રહી છે અને તે મધ્ય બંગાળની ખાડી પર પહોંચીને વધુ મજબૂત બનશે. આ વાવાઝોડાના પ્રભાવ હેઠળ દરિયાકાંઠાના વિસ્તારોમાં ભારેથી અતિ ભારે વરસાદ પડવાની સંભાવના વ્યક્ત કરવામાં આવી છે. IMD દ્વારા અંદાજ લગાવવામાં આવ્યો છે કે આ સિસ્ટમ આંધ્ર પ્રદેશ અને દક્ષિણ ઓડિશાના દરિયાકાંઠા તરફ આગળ વધી શકે છે, જો કે તેની ચોક્કસ દિશા અને લેન્ડફોલ અંગેની સ્પષ્ટ માહિતી સિસ્ટમ સંપૂર્ણ વિકસિત થયા બાદ જ સામે આવશે.

​પવનોની ગતિ અને માછીમારો માટે એલર્ટ
​ચક્રવાતના ખતરાને ધ્યાનમાં રાખીને તંત્ર સંપૂર્ણ એલર્ટ મોડ પર છે:

​દરિયામાં તોફાન: અંડમાન સમુદ્ર અને દક્ષિણ-પૂર્વ બંગાળની ખાડીમાં ૪૦ થી ૫૦ કિમી પ્રતિ કલાકની ઝડપે પવનો ફૂંકાઈ શકે છે, જે ક્યારેક વધીને ૬૦ કિમી પ્રતિ કલાક સુધી પહોંચી શકે છે.
​ખતરાની ઘંટી: જેમ જેમ વાવાઝોડું મજબૂત થશે તેમ પવનોની ઝડપ વધીને ૮૫ થી ૧૦૫ કિમી પ્રતિ કલાક સુધી જવાની શક્યતા છે.
​માછીમારો માટે સૂચના: હવામાન વિભાગે તમામ માછીમારો અને દરિયાઈ ગતિવિધિઓ સાથે સંકળાયેલા લોકોને તાત્કાલિક દરિયાકાંઠે પાછા ફરવા અને આગામી દિવસોમાં દરિયો ન ખેડવાની કડક ચેતવણી આપી છે.
​તંત્ર દ્વારા દરિયાકાંઠાના રાજ્યોમાં આપત્તિ વ્યવસ્થાપન ટીમોને તૈયાર રાખવામાં આવી છે જેથી કોઈપણ કટોકટીની સ્થિતિને પહોંચી વસી શકાય.

(2:02 PM IST)