એડિનબર્ગ ઓફ ધ સેવન સીઝ (ત્રિસ્ટાન દા કુન્હા): તા.૦૮ વિશ્વના સૌથી નિર્જન અને દુર્ગમ માનવ વસવાટ ધરાવતા ટાપુ 'ત્રિસ્ટાન દા કુન્હા' (Tristan da Cunha) પર હન્ટાવાયરસના વધતા કેસોએ વૈશ્વિક આરોગ્ય સંસ્થાઓની ઊંઘ હરામ કરી દીધી છે. બ્રિટિશ હેલ્થ સિક્યુરિટી એજન્સીના જણાવ્યા અનુસાર, અહીં વધુ એક બ્રિટિશ નાગરિકમાં આ જીવલેણ વાયરસના શંકાસ્પદ લક્ષણો જોવા મળ્યા છે. આ ટાપુ પર માત્ર ૨૫૦ લોકો રહે છે અને ત્યાં કોઈ એરપોર્ટ પણ નથી, જેના કારણે તબીબી સહાય પહોંચાડવી અત્યંત મુશ્કેલ બની ગઈ છે.
આ સંક્રમણનો સ્ત્રોત 'એમવી હોન્ડિયસ' (MV Hondius) નામનું ક્રૂઝ શિપ હોવાનું માનવામાં આવે છે. આ જહાજ પર મુસાફરી કરી રહેલા ત્રણ લોકોના પહેલા જ મોત થઈ ચૂક્યા છે. આ વાયરસ મુખ્યત્વે ઉંદરો દ્વારા ફેલાય છે, પરંતુ આ વખતે 'એન્ડીસ વાયરસ' (Andes virus) નામનો દુર્લભ સ્ટ્રેન જોવા મળ્યો છે, જે મનુષ્યથી મનુષ્યમાં પણ ફેલાઈ શકે છે. ત્રિસ્ટાન ટાપુ પહેલેથી જ આક્રમક કાળા ઉંદરોની સમસ્યાથી પીડાઈ રહ્યો છે, જે ત્યાંના પક્ષીઓ અને ખેતીને નુકસાન પહોંચાડે છે. હવે આ ઉંદરો માનવીઓ માટે પણ જીવલેણ સાબિત થઈ રહ્યા છે.
વિશ્વ આરોગ્ય સંસ્થા (WHO) ના વડા ટેડ્રોસ અધાનમ ઘેબ્રેયેસસે જીનીવા ખાતે જણાવ્યું હતું કે, અત્યાર સુધીમાં પાંચ કન્ફર્મ અને ત્રણ શંકાસ્પદ કેસ નોંધાયા છે. હન્ટાવાયરસનો ઇન્ક્યુબેશન પિરિયડ ૬ અઠવાડિયા સુધીનો હોઈ શકે છે, તેથી આગામી સમયમાં કેસો વધવાની શક્યતા છે. આ એક અત્યંત ગંભીર શ્વસન રોગ છે, જે હૃદય અને ફેફસાંને નિષ્ફળ બનાવી શકે છે. અત્યાર સુધી આની કોઈ ચોક્કસ રસી કે ઈલાજ શોધાયો નથી.
બીજી તરફ, આ ક્રૂઝ શિપ હવે સ્પેનના કેનરી ટાપુઓ તરફ આગળ વધી રહ્યું છે, જ્યાં સ્થાનિક લોકોમાં ભારે ફાળ ફેલાઈ છે. સ્પેનના અધિકારીઓ તેને 'કોવિડ ૨.૦' જેવી સ્થિતિ ગણાવી રહ્યા છે અને મુસાફરોને જહાજમાંથી ઉતરવા દેવા અંગે કડક નિયમો લાગુ કરવામાં આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પે પણ આ સ્થિતિ અંગે ચિંતા વ્યક્ત કરી છે અને આશા વ્યક્ત કરી છે કે આ વાયરસ વધુ ન ફેલાય. હાલમાં બ્રિટન, જર્મની અને દક્ષિણ આફ્રિકાના નિષ્ણાતો આ આઉટબ્રેકને કાબૂમાં લેવા માટે કામ કરી રહ્યા છે.