લખનૌ : વિદ્યાના ધામ ગણાતી યુનિવર્સિટીને કલંકિત કરતો એક અત્યંત શરમજનક અને આઘાતજનક કિસ્સો ઉત્તર પ્રદેશની પ્રતિષ્ઠિત લખનૌ યુનિવર્સિટીમાંથી સામે આવ્યો છે. યુનિવર્સિટીના ઝૂઓલોજી (પ્રાણીશાસ્ત્ર) વિભાગના એક આસિસ્ટન્ટ પ્રોફેસર દ્વારા એક મહિલા વિદ્યાર્થીનીને પરીક્ષાના પેપર લીક કરી આપવાની લાલચ આપીને કથિત રીતે શારીરિક અને માનસિક રીતે હેરાન કરવાનો સનસનાટીભર્યો મામલો પ્રકાશમાં આવ્યો છે. આ હરકતનો પર્દાફાશ કરતી ત્રણ ઓડિયો ક્લિપ્સ સોશિયલ મીડિયા પર વાયરલ થયા બાદ સમગ્ર શૈક્ષણિક જગતમાં ભારે આક્રોશ ફાટી નીકળ્યો છે. આ મામલાની ગંભીરતાને જોતાં પોલીસે શુક્રવારે મોડી રાત્રે જ નરાધમ પ્રોફેસર પરમજીત સિંહની ધરપકડ કરી જેલના સળિયા પાછળ ધકેલી દીધો છે.

વાયરલ ઓડિયો ક્લિપમાં શું છે?

સોશિયલ મીડિયા પર વાયરલ થયેલી અંદાજે બે મિનિટની ત્રણ ઓડિયો ક્લિપ્સમાં પ્રોફેસરની હેવાનીયત સ્પષ્ટ સંભળાઈ રહી છે. વાતચીતની શરૂઆતમાં પ્રોફેસર પરમજીત સિંહ વિદ્યાર્થીનીની માતાની નાદુરસ્ત તબિયત વિશે પૂછપરછ કરે છે અને ભોળો બનીને મદદની ઓફર કરે છે. તે કહે છે, "જો તારે કોઈ પણ પ્રકારની મદદ જોઈએ, માત્ર ભણવામાં જ નહીં પણ મેડિકલ કે આર્થિક સહાય, તો હું ૧૦ થી ૧૨ ડોક્ટરોને ઓળખું છું. તારા માટે બધું ખુલ્લું છે પ્રિયતમ (Dear)!" જોકે, વિદ્યાર્થીની ખૂબ જ સભ્યતાથી ના પાડી દે છે કે બધું મેનેજ થઈ જશે.

"મેં તારા માટે બંને પેપર લીક કરી દીધા છે, તું ક્યારે આવે છે?"

ત્યારબાદ આ નરાધમ પ્રોફેસર અસલી ઓકાત પર આવી જાય છે અને ચાલુ પરીક્ષાઓના પેપરનો સોદો કરવા લાગે છે. તે કહે છે, "સારું, તારી પરીક્ષાઓ પૂરી થયા પછી તું કયા દિવસે મને મળવા આવે છે? મેં તારા ઓપ્શનલ અને મેઈન સબ્જેક્ટ બંનેના પેપર લીક કરી દીધા છે. મારી પાસે આખું પેપર છે યાર, તું બસ આવી જા."

જ્યારે વિદ્યાર્થીની બહાનું કાઢે છે કે તેણે પૂરી તૈયારી કરી લીધી છે અને ઘરે જવાબદારીઓ હોવાના કારણે તે બહાર આવી શકે તેમ નથી, ત્યારે પણ પ્રોફેસર સતત દબાણ ચાલુ રાખે છે અને કહે છે, "તો તું મને એકવાર પણ નહીં મળે? સાત દિવસની અંદર ગમે ત્યારે આવી જા, ઠીક છે?" ક્લિપના અંતમાં પીડિત વિદ્યાર્થીનીનો રડમસ અવાજ સંભળાય છે જેમાં તે કહી રહી છે કે આ પ્રોફેસર તેને લાંબા સમયથી વારંવાર ફોન કરીને માનસિક રીતે ટોર્ચર કરી રહ્યો છે.

યુનિવર્સિટી પ્રશાસન એક્શનમાં: ૨૪ કલાકનું અલ્ટીમેટમ

આ ઓડિયો ક્લિપ વાયરલ થતાં જ લખનૌ યુનિવર્સિટીના વાઇસ ચાન્સેલર પ્રોફેસર જે.પી. સૈની તુરંત એક્શનમાં આવ્યા હતા. તેમણે યુનિવર્સિટીની 'આંતરિક ફરિયાદ સમિતિ' (Internal Complaints Committee) ને આ મામલાની તાત્કાલિક ઉચ્ચ સ્તરીય તપાસ કરવા અને ૨૪ કલાકની અંદર સત્તાવાર રિપોર્ટ સોંપવા આદેશ આપ્યો છે. યુનિવર્સિટીના પ્રવક્તા પ્રોફેસર મુકુલ શ્રીવાસ્તવે જણાવ્યું કે આ પ્રકારની ગેરવર્તણૂક ચલાવી લેવાશે નહીં અને કડક આકરા પગલાં લેવાશે.

નવા કાયદા હેઠળ ગુનો દાખલ, કરિયર ખતમ:

યુનિવર્સિટીના પરીક્ષા નિયંત્રક વિદ્યા નંદ ત્રિપાઠીએ આ સમગ્ર મામલે હસનગંજ પોલીસ સ્ટેશનમાં સત્તાવાર ફરિયાદ નોંધાવી હતી, જેમાં તેમણે પ્રોફેસરની વાતચીતને અત્યંત "અભદ્ર અને કલંકિત" ગણાવી હતી. પોલીસે આ મામલે 'ભારતીય ન્યાય સંહિતા' (BNS) ની કલમ ૭૪ (મહિલાની ગરિમાને ઠેસ પહોંચાડવી અને હેરાનગતિ) તેમજ સંગઠિત પેપર લીક કાયદા હેઠળ ગુનો નોંધી પ્રોફેસરની ધરપકડ કરી લીધી છે. આ ઘટના બાદ યુનિવર્સિટીના અન્ય વિદ્યાર્થીઓમાં પણ રોષનો માહોલ છે.