<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Friday, 20th November 2026

કાચી ખાંડના આયાત ક્વૉટાની અરજી માટે DGFT ની વન ટાઈમ સિંગલ વિન્ડો શરૂ: ૨.૧૫ લાખ ટનથી વધુ જથ્થો નવી ફાળવણી માટે ઉપલબ્ધ

ઓગસ્ટમાં ૧૦ લાખ ટનની મંજૂરી બાદ શેષ અને પરત કરાયેલા જથ્થાની ફાળવણી, ૨૭ નવેમ્બર સુધી અરજી કરવાની તક, રિફાઈનિંગ ક્ષમતા ફરજિયાત.

નવી દિલ્હી : ડિરેક્ટોરેટ જનરલ ઑફ ફોરેન ટ્રેડ (DGFT) દ્વારા ટૅરિફ રેટ ક્વૉટા (TRQ) સ્કીમ હેઠળ કાચી ખાંડના આયાત ક્વૉટાની ફાળવણી માટે અરજી કરવા વન ટાઈમ સિંગલ વિન્ડો શરૂ કરવામાં આવી છે, જેમાં અરજદારો ૨૭ નવેમ્બર સુધી અરજી કરી શકશે.

 

અહેવાલો મુજબ, ગત ઓગસ્ટમાં સરકારે TRQ હેઠળ ૧૦ લાખ ટન કાચી ખાંડની આયાત મંજૂર કરી હતી અને માન્યતાપ્રાપ્ત ખાંડ મિલો તથા રિફાઈનરોને ૮,૧૨,૪૫૦ ટનની ફાળવણી કરાઈ હતી, જ્યારે ફાળવાયેલા જથ્થામાંથી ૨૭,૪૯૩.૮૫૯ ટન જથ્થો પરત કરવામાં આવ્યો હતો.

 

અગાઉ ફાળવવામાં ન આવેલા ૧,૮૭,૫૫૦ ટન અને પરત કરાયેલા ૨૭,૪૯૩.૮૫૯ ટન મળીને કુલ ૨,૧૫,૦૪૩.૮૫૯ ટન કાચી ખાંડનો જથ્થો TRQ હેઠળ નવી ફાળવણી માટે ઉપલબ્ધ હોવાનું DGFT એ જણાવ્યું છે.

 

માન્યતા અવધીમાં વધારો અને ઉપલબ્ધ શેષ જથ્થાને ધ્યાનમાં રાખીને શરૂ કરાયેલી આ પ્રક્રિયા હેઠળ અરજદારો પાસે કાચી ખાંડને રિફાઈન્ડ ખાંડમાં રૂપાંતરિત કરવાની પોતાની કાર્યક્ષમતા હોવી જરૂરી છે.

 

અહેવાલોમાં નોંધાયું છે કે વાણિજ્ય મંત્રાલય હેઠળના DGFT દ્વારા આ વન ટાઈમ વિન્ડો મારફતે ખાંડ મિલો અને રિફાઈનરો પાસેથી બાકી રહેલા જથ્થા માટે નવી અરજીઓ મગાવવામાં આવી રહી છે.

 

હવે ૨૭ નવેમ્બર સુધી પ્રાપ્ત થનારી અરજીઓ, બાકીના ૨,૧૫,૦૪૩.૮૫૯ ટન જથ્થાની નવી ફાળવણી અને ખાંડ બજારમાં તેની અસર પર સૌની નજર રહેશે.

(8:53 PM IST)