નવી દિલ્હી : ચાલુ વર્ષે તહેવારોની મોસમમાં ઓટોમોબાઇલ ક્ષેત્રે જબરદસ્ત રોનક જોવા મળી છે, જેમાં ધનતેરસ અને દિવાળીના શુભ પર્વ પર દેશના પાટનગર દિલ્હીમાં વાહનોનું રેકોર્ડબ્રેક બમ્પર વેચાણ નોંધાયું છે. વાહન વ્યવહાર વિભાગના અધિકૃત ડેટા અનુસાર, ધનતેરસ અને દિવાળીના પવિત્ર દિવસો દરમિયાન દિલ્હીમાં કુલ ૨૫,૪૮૨ નવા વાહનોની નોંધણી થઈ છે. શોરૂમ્સ પર ગ્રાહકોની ભારે ભીડ અને વાહનોના ક્રેઝને કારણે ઓટો સેક્ટરમાં મોટો ઉછાળો જોવા મળ્યો છે.

આંકડાકીય વિગતો મુજબ, કુલ નોંધાયેલા વાહનોમાંથી ૧૮,૮૯૮ ટુ-વ્હીલર એટલે કે બાઇક અને સ્કૂટર તથા ૬,૨૩૦ ચાર પૈડાંવાળી કારનો સમાવેશ થાય છે. આ વર્ષે ઓક્ટોબર મહિનામાં યોજાયેલા નવરાત્રી મહોત્સવ દરમિયાન પણ વાહનોની ખરીદીમાં અભૂતપૂર્વ વધારો જોવા મળ્યો હતો, જેના પરિણામે એકલા સમગ્ર ઓક્ટોબર મહિનામાં જ આશરે ૯૧,૦૦૦ જેટલા નવા વાહનો રજીસ્ટર થયા હતા.

બીજી તરફ, ગયા વર્ષે નવરાત્રી, ધનતેરસ અને દિવાળી જેવા મુખ્ય તહેવારો એક જ મહિનામાં પડ્યા હતા, જેના કારણે બે અલગ-અલગ વર્ષો વચ્ચે વાહન વેચાણના આંકડાઓની સરખામણી કરવી અયોગ્ય બની રહે છે. પરંતુ આ વર્ષના ટ્રેન્ડ પર નજર કરીએ તો, ૮ નવેમ્બર સુધીમાં સમગ્ર ઓક્ટોબર અને નવેમ્બર મહિના માટે થઈને દિલ્હીમાં કુલ વાહન નોંધણીનો આંકડો આશરે ૧.૨૬ લાખ સુધી પહોંચી ગયો છે, જે બજારમાં સુધારાની મજબૂત સ્થિતિ દર્શાવે છે.

તહેવારોની સીઝનમાં થયેલા આ બમ્પર વેચાણથી ઓટોમોબાઇલ ડીલરો અને ઉત્પાદક કંપનીઓમાં ભારે ઉત્સાહનો માહોલ છે. વાહન વ્યવહાર વિભાગ હાલમાં બાકી રહેલી નવી અરજીઓની રજીસ્ટ્રેશન પ્રક્રિયા ઝડપથી પૂર્ણ કરી રહ્યો છે. આગામી લગ્નસરાની સીઝનને ધ્યાનમાં રાખીને વાહન વેચાણની આ સકારાત્મક ગતિ જળવાઈ રહેવાની ધારણા છે, જ્યારે પ્રશાસન દ્વારા તહેવારો બાદ રોડ પર વધેલા નવા વાહનોના ટ્રાફિક સંચાલન માટે વિશેષ વ્યવસ્થા ગોઠવવામાં આવી રહી છે.