​નવી દિલ્હી, ૨૪ જુલાઈ:દેશમાં બદલાતા સામાજિક પરિવેશ અને કૌટુંબિક માળખામાં આવી રહેલા મોટા પરિવર્તનોને પગલે નવી પેઢીના ભવિષ્ય પર મંડરાઈ રહેલા જોખમ અંગે ભારતીય ન્યાયતંત્રના સર્વોચ્ચ શિખરેથી એક અત્યંત ચિંતાજનક અને મહત્વપૂર્ણ અવલોકન સામે આવ્યું છે. દેશની સર્વોચ્ચ અદાલત (સુપ્રીમ કોર્ટ) દ્વારા ભારતીય સંસ્કૃતિના પાયા સમાન સંયુક્ત પરિવાર પ્રણાલીના ક્રમશઃ થઈ રહેલા વિઘટન અને માસૂમ બાળકોના હાથમાં સોંપાઈ રહેલા આધુનિક ગેજેટ્સના ચલણ સામે તીવ્ર ચિંતા અને નારાજગી વ્યક્ત કરવામાં આવી છે.

​સર્વોચ્ચ અદાલતે સામાજિક સંબંધોમાં આવી રહેલા આ બદલાવ અંગે લાલબત્તી ધરતા સ્પષ્ટ શબ્દોમાં જણાવ્યું છે કે, વર્તમાન સમયમાં જે રીતે માતા-પિતા પોતાના બાળકોને સમય આપવાના બદલે તેમનું ધ્યાન ભટકાવવા કે વ્યસ્ત રાખવા માટે ડિજિટલ સાધનો (મોબાઈલ, ટેબ્લેટ કે અન્ય ગેજેટ્સ) આસાનીથી સોંપી દે છે, તે ટ્રેન્ડ સમગ્ર સમાજના નૈતિક પતન માટે જવાબદાર બની શકે છે. માતા-પિતાના સ્નેહ, હૂંફ અને માર્ગદર્શનની જગ્યા જ્યારે ટેકનોલોજીકલ સાધનો લેવા માંડે છે, ત્યારે તે આવનારી પેઢી અને સમગ્ર સામાજિક વ્યવસ્થા માટે લાંબા ગાળે અત્યંત વિનાશકારી સાબિત થશે.

​ન્યાયાલયે પોતાના અવલોકનમાં વધુમાં ઉમેર્યું હતું કે, પરંપરાગત સંયુક્ત પરિવારોમાં બાળકોને દાદા-દાદી કે અન્ય વડીલોનો જે પ્રકૃતિક સહવાસ અને સંસ્કારોનું ભાથું મળતું હતું, તે વ્યવસ્થા હવે વિભક્ત પરિવારોના કારણે લુપ્ત થઈ રહી છે. પરિણામે એકલતા અનુભવતા બાળકો ડિજિટલ સ્ક્રીનના રવાડે ચઢી રહ્યા છે, જે તેમના માનસિક વિકાસને અવરોધી રહ્યું છે. કોર્ટે વડીલો અને વાલીઓને કૌટુંબિક સંવાદ વધારવા તેમજ બાળકો પ્રત્યેની જવાબદારીઓ પ્રત્યે વધુ સજાગ બનવા આડકતરો ઈશારો કર્યો છે.