તા. ૨૦ સપ્ટેમ્બર ર૦ર૫ વિક્રમ સંવત ર૦૮૧ ભાદરવો વદ – ૧૪ શનિવાર
શું ઠંડા પીણાં જેવા ગળ્યા પીણાં કેન્સરનું જોખમ વધારે છે?
નવા વૈશ્વિક સંશોધનમાં આﾍર્યજનક તારણો બહાર આવ્યા : નવા વૈશ્વિક સંશોધનમાં ઠંડા પીણાં અને પેકેજ્ડ જ્યુસ જેવા ખાંડવાળા પીણાંના નિયમિત સેવન અને ચોક્કસ કેન્સરના વધતા જોખમ વચ્ચે એક જોડાણ દર્શાવવામાં આવ્યું છે. જે લોકો દરરોજ આશરે ૩૫૫ મિલી ખાંડવાળા પીણાંનું સેવન કરે છે તેમને સ્વાદુપિંડ અને કોલોરેક્ટલ કેન્સરનું જોખમ વધારે હોવાનું જાણવા મળ્યું છે
નવી દિલ્હી તા.૧૬: જો ઠંડા પીણાં અથવા સમાન ખાંડવાળા પીણાં તમારું વ્યસન બની ગયા છે તો સાવચેત રહો. એક મુખ્ય વૈશ્વિક સમીક્ષામાં ઠંડા પીણાં, પેકેજ્ડ મીઠાવાળા જ્યુસ અને આવા અન્ય પીણાંના નિયમિત સેવનને કેન્સરના જોખમ સાથે જોડતા વૈજ્ઞાનિક પુરાવા મળ્યા છે. વર્લ્ડ કેન્સર રિસર્ચ ફંડના ગ્લોબલ કેન્સર અપડેટ પ્રોગ્રામ હેઠળ સંશોધકોએ વિશ્વભરમાં ૫૧ કોહોર્ટ અભ્યાસોમાંથી ૧૫૮ અહેવાલોનું વિશ્લેષણ કર્યું.
રિપોર્ટ મુજબ, જે લોકો દરરોજ આશરે ૩૫૫ મિલી (લગભગ એક કેન) ખાંડવાળા પીણાંનું સેવન કરે છે તેમને સ્વાદુપિડના કેન્સરનું જોખમ ૯% અને કોલોરેક્ટલ કેન્સરનું જોખમ ૭% વધ્યું હતું. સંશોધકો આ બંને કેન્સર માટેના પુરાવાઓને મજબૂત માને છે.
દરરોજ પીવાથી સ્થૂળતાનું જોખમ વધે છે. ખાંડવાળા પીણાંનો વધુ પડતો વપરાશ સ્થૂળતા સંબંધિત કેટલાક અન્ય કેન્સર, જેમ કે અંડાશયના કેન્સર અને સ્તન કેન્સર સાથે પણ સંકળાયેલ હોઈ શકે છે. જો કે, આના પુરાવા મર્યાદિત છે. ખાંડવાળા પીણાંનો વારંવાર ઉપયોગ સ્થૂળતા, ઇન્સ્યુલિન પ્રતિકાર અને બળતરામાં વધારો કરી શકે છે, જે કેન્સર માટે જાણીતા જોખમ પરિબળો છે.
અભ્યાસમાં ડાયેટ ડ્રિક્સ જેવા કૃત્રિમ રીતે મીઠાવાળા પીણાંનું મૂલ્યાંકન કરવામાં આવ્યું હતું. સંશોધકોને કેન્સરના જોખમમાં વધારો થવાના કોઈ નક્કર પુરાવા મળ્યા નથી. કેટલાક મર્યાદિત અભ્યાસોએ લ્યુકેમિયા (બ્લડ કેન્સર) સાથે સંભવિત જોડાણ સૂચવ્યું છે, જેની પુષ્ટિ થવાની બાકી છે.
દિલ્હીના કાર્ડિયોલોજી પ્રોફેસર ડો. તરુણ કુમારે જણાવ્યું હતું કે હવે ખાંડવાળા પીણાંના વધુ સેવનને સ્વાદુપિડ અને કોલોરેક્ટલ કેન્સર સાથે જોડતા કામચલાઉ વૈજ્ઞાનિક પુરાવા છે. કેટલાક અન્ય કેન્સર માટે પણ સંકેતો છે. સંશોધકોએ સ્પષ્ટતા કરી હતી કે તેઓ એમ કહી શકતા નથી કે ઠંડા પીણાં પીવાથી કેન્સર થાય છે, પરંતુ નિયમિત સેવનથી જોખમ રહેલું છે.
રિપોર્ટમાં નિયમિતપણે સોફટ ડ્રિક્સ પીવાથી કોઈ વધારાના સ્વાસ્થ્ય લાભ મળ્યા નથી. આખા ફળ ખાવાથી વધુ ફાયદાકારક છે. વધુ પડતા નારંગીના રસના સેવન અને મેલાનોમા વચ્ચે જોડાણ હોવાના સંકેતો છે.
(10:31 AM IST)
છેલ્લા 8 દિવસમાં સૌથી લોકપ્રિય 
