નવી દિલ્હી, તા.૦૭: વિશ્વભરમાં ભારતનો પ્રભાવ અને ભારતીય સમુદાય (ઈન્ડિયન ડાયસ્પોરા)નો દબદબો સતત વધી રહ્યો છે. ગ્લોબલ ઇકોનોમીથી લઈને વિવિધ દેશોની રાજનીતિ અને આઇટી સેક્ટરમાં ભારતીયો પોતાની અમીટ છાપ છોડી રહ્યા છે. ભારતના વિદેશ મંત્રાલય (MEA) દ્વારા જાહેર કરવામાં આવેલા તાજેતરના ઓફિશિયલ આંકડાઓ અનુસાર, વિશ્વના અલગ-અલગ ખૂણાઓમાં રહેતા ભારતીય મૂળના લોકોની યાદીમાં યુનાઇટેડ સ્ટેટ્સ ઓફ અમેરિકા (USA) સૌથી મોખરાના સ્થાને આવી ગયું છે.

અમેરિકામાં હાલમાં આશરે ૫૪ લાખ (૫.૪ મિલિયન)થી વધુ ભારતીયો વસવાટ કરી રહ્યા છે, જે વિશ્વના કોઈ પણ એક દેશમાં ભારતીય વસ્તીનો સૌથી મોટો આંકડો છે. અમેરિકામાં ભારતીયો માત્ર સામાન્ય નોકરીઓ જ નહીં, પરંતુ ગૂગલ અને માઇક્રોસોફ્ટ જેવી ટેક જાયન્ટ્સમાં સીઇઓ (CXO), સોફ્ટવેર એન્જિનિયર્સ, સિનિયર સાયન્ટિસ્ટ્સ, ટોચના ડોક્ટર્સ અને પ્રોફેસર્સ તરીકે અગ્રણી ભૂમિકા ભજવી રહ્યા છે. આ સિવાય ટેક્સાસથી લઈને કાલિફોર્નિયા સુધી મોટેલ્સ, રિટેલ ચેઈન અને સફળ સ્ટાર્ટઅપ્સ ઊભા કરવામાં પણ ભારતીયો આગળ છે.

અમેરિકા બાદ સંયુક્ત આરબ અમીરાત (UAE) બીજા ક્રમે આવે છે, જ્યાં ૩૬ લાખથી ૩૮.૯ લાખ ભારતીયો રહે છે. ખાડી દેશોમાં ભારતીય કુશળ અને અર્ધકુશળ કામદારો કન્સ્ટ્રક્શન, હોટેલ્સ અને સર્વિસ સેક્ટરમાં કરોડરજ્જુ સમાન છે, જ્યારે હવે બેંકિંગ અને આઈટીમાં પણ તેમનું વર્ચસ્વ વધી રહ્યું છે. ત્રીજા અને ચોથા ક્રમે મલેશિયા (૨૯થી ૩૯ લાખ) અને કેનેડા (૨૮થી ૩૬ લાખ) આવે છે. કેનેડાના ટ્રાન્સપોર્ટ અને લોજિસ્ટિક્સ ક્ષેત્રે ખાસ કરીને પંજાબી સમુદાયના ટ્રક ડ્રાઇવરો અને આઇટી પ્રોફેસનલ્સનો મોટો હાથ છે.