દુબઈ (ન્યૂઝફર્સ્ટ): સંયુક્ત આરબ અમીરાત (UAE) અને ઈરાન વચ્ચે વર્ષોથી ચાલી રહેલા સંઘર્ષમાં ફરી એકવાર વિસ્ફોટક સ્થિતિ સર્જાઈ છે. અમેરિકા અને ઈરાન વચ્ચેના યુદ્ધવિરામ બાદ પ્રથમ વખત દુબઈ માટે મિસાઈલ એલર્ટ જારી કરવામાં આવ્યું છે. યુએઈ સરકારે સત્તાવાર રીતે સેફ્ટી એલર્ટ જાહેર કરીને નાગરિકોને સાવચેત રહેવા સૂચના આપી છે. આ હુમલાના પગલે સમગ્ર અખાતી દેશોમાં યુદ્ધ જેવી સ્થિતિનું નિર્માણ થયું છે.

એર ડિફેન્સે ત્રણ મિસાઈલો તોડી પાડી

યુએઈના સંરક્ષણ મંત્રાલયે અહેવાલ આપ્યો છે કે ઈરાન તરફથી અનેક મિસાઈલો અને ડ્રોન દ્વારા હુમલાનો પ્રયાસ કરવામાં આવ્યો હતો. જોકે, યુએઈની અત્યાધુનિક એર ડિફેન્સ સિસ્ટમે તાત્કાલિક કાર્યવાહી કરીને ઈરાનથી આવતી ત્રણ મિસાઈલોને હવામાં જ આંતરીને તેનો નાશ કર્યો છે. હાલમાં પણ એર ડિફેન્સ સિસ્ટમ અન્ય શંકાસ્પદ ડ્રોન અને હુમલાઓને રોકવા માટે સતત કાર્યરત છે.

દરિયામાં જહાજ સળગ્યું અને વિમાનો અટવાયા

આ હુમલાની અસર દરિયાઈ અને હવાઈ માર્ગો પર પણ જોવા મળી છે. બ્રિટિશ સૈન્યના જણાવ્યા અનુસાર, યુએઈના દરિયાકાંઠે એક કાર્ગો શિપ (માલવાહક જહાજ) માં ભીષણ આગ ફાટી નીકળી છે. આ દરમિયાન ગલ્ફ કોઓપરેશન કાઉન્સિલ (GCC) ના વડાએ ઈરાન દ્વારા યુએઈના ઓઈલ ટેન્કર પર કરવામાં આવેલા હુમલાને સખત શબ્દોમાં વખોડી કાઢ્યો છે. સુરક્ષાના કારણોસર દુબઈ અને શારજાહ જતી તમામ ફ્લાઈટ્સને હાલમાં હવામાં જ રોકી દેવામાં આવી છે અથવા હોલ્ડ પર રાખવામાં આવી છે.

વૈશ્વિક સ્તરે ચિંતાનો માહોલ

યુએઈ પર થયેલા આ મિસાઈલ અને ડ્રોન સ્ટ્રાઈકના કારણે આંતરરાષ્ટ્રીય સ્તરે ચિંતા વ્યાપી ગઈ છે. ખાસ કરીને ઓઈલ ટેન્કર પરના હુમલાથી ક્રૂડ ઓઈલના પુરવઠા પર અસર થવાની ભીતિ સેવાઈ રહી છે. ખાડી દેશોના સંગઠનોએ ઈરાનની આ કાર્યવાહી સામે રોષ વ્યક્ત કર્યો છે અને સ્થિતિ પર સતત નજર રાખવામાં આવી રહી છે. દુબઈમાં હાલમાં હાઈ-એલર્ટ જાહેર કરવામાં આવ્યું છે અને નાગરિકોને સલામત સ્થળે રહેવા જણાવાયું છે.