મર્સિડીઝ બેન્ઝની પ્રીમિયમ કારોમાં E20 પેટ્રોલનો ઉપયોગ સુરક્ષિત: વાયરલ વીડિયો અને માઇલેજ ઘટાડાના આક્ષેપો વચ્ચે લક્ઝરી કાર મેકરની સત્તાવાર સ્પષ્ટતા
એક પ્રખ્યાત વ્લોગર દ્વારા કરાયેલા ગંભીર દાવા બાદ મર્સિડીઝ બેન્ઝે બહાર પાડ્યું અધિકૃત નિવેદન, તમામ BS VI પેટ્રોલ વાહનો ઈથેનોલ-મિશ્રિત ઈંધણ માટે ટેકનિકલ રીતે સક્ષમ હોવાની પુષ્ટિ કરી
નવી દિલ્હી: દેશમાં ઈથેનોલ-મિશ્રિત પેટ્રોલ એટલે કે E20 ઇંધણના વપરાશને લઈને વાહન ચાલકોમાં જાગેલી મૂંઝવણ વચ્ચે લક્ઝરી કાર નિર્માતા કંપની મર્સિડીઝ બેન્ઝ ઇન્ડિયાએ મહત્વપૂર્ણ ખુલાસો કર્યો છે. સોશિયલ મીડિયા પર એક જાણીતા વ્લોગર દ્વારા મર્સિડીઝની કારમાં E20 પેટ્રોલ પુરાવ્યા બાદ માઇલેજમાં મોટો ઘટાડો નોંધાયો હોવાનો દાવો કરવામાં આવ્યો હતો, જે બાદ માલિકોમાં ચિંતાનું મોજું ફરી વળ્યું હતું. આ આક્ષેપોના જવાબમાં મર્સિડીઝ બેન્ઝે સ્પષ્ટપણે જણાવ્યું છે કે તેમની તમામ BS VI પેટ્રોલ સંચાલિત કારો E20 ઇંધણ સાથે કામ કરવા માટે સંપૂર્ણપણે સુસંગત છે.
શું હતો સમગ્ર વિવાદ?
સોશિયલ મીડિયા પર ખૂબ જ લોકપ્રિય વ્લોગરે એક વીડિયો શેર કર્યો હતો, જેમાં તેમણે દાવો કર્યો હતો કે જ્યારે તેમણે તેમની મર્સિડીઝ-બેન્ઝ એસયુવીમાં E20 પેટ્રોલ પુરાવ્યું, ત્યારે તેની માઇલેજ અચાનક 17 કિમી પ્રતિ લીટરથી ઘટીને માત્ર 5 કિમી પ્રતિ લીટર થઈ ગઈ હતી. વ્લોગરના આ વીડિયોને પગલે સોશિયલ મીડિયા પર ચર્ચાઓ છેડાઈ હતી કે શું ખરેખર લક્ઝરી એન્જિન E20 પેટ્રોલને સહન કરવામાં અસમર્થ છે? આ વીડિયોના વાયરલ થવાથી મર્સિડીઝ જેવી પ્રીમિયમ કાર ધરાવતા ગ્રાહકોમાં પણ દહેશત જોવા મળી હતી.
કંપનીની સત્તાવાર સ્પષ્ટતા
આ ઘટનાક્રમ બાદ મર્સિડીઝ બેન્ઝ ઇન્ડિયાએ સત્તાવાર નિવેદન જારી કરીને ગ્રાહકોને આશ્વસ્ત કર્યા છે. કંપનીએ જણાવ્યું હતું કે, “મર્સિડીઝ બેન્ઝ માટે વાહનોની સુરક્ષા, એન્જિનની ક્ષમતા અને ગ્રાહકોનો સંતોષ સૌથી મહત્વપૂર્ણ છે. અમારી કંપનીના તમામ BS VI માનક ધરાવતા પેટ્રોલ વાહનો E20 ઇંધણ (જેમાં 20% ઈથેનોલ હોય છે) સાથે વાપરવા માટે ટેકનિકલ અને મટિરિયલની દ્રષ્ટિએ સંપૂર્ણ રીતે સક્ષમ છે.” કંપનીએ એમ પણ ઉમેર્યું હતું કે આ વાહનો સંબંધિત સત્તાવાળાઓ દ્વારા પ્રમાણિત છે અને ગ્રાહકોએ આ અંગે ચિંતા કરવાની જરૂર નથી.
ઇંધણની ગુણવત્તા પર નિષ્ણાતોનો મત
ઓટોમોબાઈલ નિષ્ણાતોનું માનવું છે કે માઇલેજમાં થતો અચાનક ઘટાડો હંમેશા ઇંધણના પ્રકારને કારણે નથી હોતો, પરંતુ ક્યારેક પેટ્રોલ પંપ પર મળતી નબળી ગુણવત્તા કે ઇંધણમાં ભેળસેળને કારણે પણ આવી શકે છે. કંપનીના નિષ્ણાતોએ પણ સલાહ આપી છે કે ગ્રાહકોએ હંમેશા અધિકૃત અને વિશ્વાસપાત્ર પેટ્રોલ પંપ પરથી જ ઇંધણ મેળવવું જોઈએ જેથી વાહનના પર્ફોર્મન્સ પર કોઈ અસર ન પડે. સરકારના નવા નિયમો મુજબ, પ્રદૂષણ ઘટાડવાના ભાગરૂપે હવે તમામ નવા વાહનોને E20 ઇંધણના અનુરૂપ બનાવવામાં આવ્યા છે, જેથી પર્યાવરણને ન્યૂનતમ નુકસાન થાય.
(3:20 PM IST)
છેલ્લા 8 દિવસમાં સૌથી લોકપ્રિય 
