વોશિંગ્ટન : અમેરિકાના કેલિફોર્નિયા રાજ્યમાંથી મોટા સમાચાર સામે આવ્યા છે. ઉત્તર કેલિફોર્નિયાના લેક કાઉન્ટી વિસ્તારમાં બુધવારે વહેલી સવારે ભૂકંપના તીવ્ર આંચકા અનુભવાયા હતા. રિક્ટર સ્કેલ પર આ ભૂકંપની તીવ્રતા ૪.૦ ની નોંધાઈ હતી, જેનું કેન્દ્રબિંદુ લેક પિલ્સબરી (Lake Pillsbury) ની આસપાસ રહ્યું હતું.

યુએસજીએસ (USGS) ના આંકડા મુજબ આ ભૂકંપ, સ્થાનિક સમય પ્રમાણે, સવારે ૫ વાગ્યાની બરાબર આસપાસ, લેક પિલ્સબરીથી ઉત્તરમાં આશરે ૬ માઈલના અંતરે અને ૬.૫ માઈલની ઊંડાઈએ ત્રાટક્યો હતો. શરૂઆતમાં આ ધરતીકંપ ૩.૯ તીવ્રતાનો હોવાનું આંકવામાં આવ્યું હતું, પરંતુ બાદમાં તેને સુધારીને ૪.૦ ની તીવ્રતા જાહેર કરવામાં આવી હતી. યુએસજીએસના "ડિડ યુ ફીલ ઇટ?" પોલ મુજબ ઓછામાં ઓછા પાંચ લોકોએ આ આંચકા અનુભવ્યા હોવાનું સામે આવ્યું છે.

આ ભૂકંપની સૌથી વધુ અસર મેન્ડોસિનો નેશનલ ફોરેસ્ટ (Mendocino National Forest) ના વિસ્તારોમાં જોવા મળી હતી, જે કોઈપણ મોટા વસ્તીવાળા શહેરો કે કેન્દ્રોથી દૂર હોવાથી મોટી રાહત રહી હતી. સત્તાવાર માહિતી અનુસાર આ દુર્ઘટનામાં અત્યાર સુધી કોઈ જાનહાની કે ઈજાના અહેવાલ પ્રાપ્ત થયા નથી.

આ ભૂકંપ બાદ વૈજ્ઞાનિકો અને સંશોધકો દ્વારા આગામી એક અઠવાડિયા દરમિયાન આફ્ટરશોક (પછીના આંચકા) ની સંભાવના પણ વ્યક્ત કરવામાં આવી છે. યુએસજીએસના અંદાજ મુજબ ઓછામાં ઓછી ૩.૦ ની તીવ્રતાના આફ્ટરશોક આવવાની ૧૪% સંભાવના છે, જ્યારે ૪.૦ કે તેથી વધુ તીવ્રતાનો ભૂકંપ આવવાની ૨% શક્યતા દર્શાવવામાં આવી છે. ઉલ્લેખનીય છે કે પેટ્રોલિયાથી પશ્ચિમમાં મહાસાગરના તળિયે ૪.૮ ની તીવ્રતાનો ભૂકંપ આવ્યા પછીનો આ સૌથી શક્તિશાળી ભૂકંપ માનવામાં આવી રહ્યો છે. લેક પિલ્સબરી એ પોટર વેલીથી ઉત્તરપૂર્વમાં આશરે ૧૮ માઈલના અંતરે આવેલું છે.