સિએટલ:  અમેરિકા જઈને કરોડો રૂપિયા કમાવવાનું સપનું દરેક ભારતીય જોતો હોય છે, પરંતુ ત્યાંની મોંઘવારીની વાસ્તવિકતા કંઈક અલગ જ છે. એમેઝોન કંપનીમાં સિનિયર પ્રોડક્ટ મેનેજર તરીકે કામ કરતા અને મૂળ ભારતીય એવા ઈશાન જૈને તાજેતરમાં એક ઈન્ટરવ્યુમાં ખુલાસો કર્યો છે કે વાર્ષિક આશરે ₹2.8 કરોડ ($285,000) જેવો મસમોટો પગાર હોવા છતાં, તેઓ અમેરિકામાં આર્થિક રીતે સંપૂર્ણ સુરક્ષિત અનુભવતા નથી. ટેક્સ અને નિવૃત્તિ ભંડોળના કપાત પછી દર મહિને તેમના હાથમાં આશરે ₹11 લાખ ($12,000) આવે છે. જોકે, સિએટલ જેવા મોંઘા શહેરમાં માત્ર એક જ વ્યક્તિની કમાણી પર ચાર સભ્યોના પરિવારનું ગુજરાન ચલાવવું હવે લોઢાના ચણા ચાવવા જેવું સાબિત થઈ રહ્યું છે.

આ આર્થિક ભીંસ પાછળનું મુખ્ય કારણ તેમનો હાઈ-ફાઈ લાઈફસ્ટાઈલ ખર્ચ અને આસમાને આંબતી મોંઘવારી છે. ઈશાન હાલમાં પોતાની પત્ની અને બાળક સાથે સિએટલમાં 4-બેડરૂમના આલીશાન ઘરમાં રહે છે, જેનો માસિક EMI, ટેક્સ અને વીમો મળીને જ લગભગ ₹4.7 લાખ ($5,000) સરકી જાય છે. આ સિવાય તેમની પાસે ટેસ્લા અને રેન્જ રોવર જેવી વૈભવી કાર છે, જેમાં ટેસ્લાનો હપ્તો જ દર મહિને ₹50,000થી વધુ આવે છે અને બંને ગાડીઓનું ઈંધણ તથા વીમો અલગ. આટલું ઓછું હોય તેમ, દર મહિને ઘરનું લાઈટ-પાણીનું બિલ ₹65,000, હેલ્થ ઈન્સ્યોરન્સના ₹62,000 અને માત્ર કોસ્ટકો તથા અન્ય સ્ટોર્સમાંથી કરિયાણું ખરીદવામાં જ દર મહિને આશરે ₹1.6 લાખથી વધુનો ધુમાડો થઈ જાય છે.

બીજી તરફ, ઈશાન 50 વર્ષની ઉંમરે વહેલા નિવૃત્ત થવાનું સપનું જોઈ રહ્યા છે, જેના કારણે તેઓ ખૂબ જ આક્રમક રીતે રોકાણ કરી રહ્યા છે. તેમણે ભવિષ્યમાં ભાડાની કમાણી માટે ભારતમાં જ 3 થી 4 પ્રોપર્ટી ખરીદી લીધી છે, જ્યારે દર મહિને ₹3.3 લાખથી વધુ રકમ શેરબજાર, સોના-ચાંદી અને સેવિંગ્સમાં રોકે છે. આ આંધળા રોકાણને કારણે તેમની પાસે કોઈ તાત્કાલિક ઈમરજન્સી ફંડ નથી અને હાલમાં તેમના પર ₹16 લાખ ($20,000)નું અંગત દેવું પણ છે. હવે ઘરમાં બીજા બાળકના આગમનની તૈયારીઓ વચ્ચે તેઓ બાળકના ઉચ્ચ શિક્ષણ માટે અલગથી દર મહિને ₹40,000નું ફંડ શરૂ કરવા જઈ રહ્યા છે, જે દર્શાવે છે કે બહારથી ચમકતી આ 'ડોલરની દુનિયા' અંદરથી કેટલી ખર્ચાળ છે.