તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
દીકરી પરિણીત હોય તો પણ પરિવારનો હિસ્સો
સુપ્રીમ કોર્ટના ચુકાદાથી અનેક પરિવારોને મળશે રાહતઃ અનુકંપાના આધારે નિમણૂક માટે ‘પરિવાર'ની વ્યાખ્યામાંથી પરિણીત પુત્રીઓને બાકાત રાખવી ગેરબંધારણીય છે પરિણીત પુત્રીઓને નિમણૂકથી વંચિત રાખવી એ ભારતનું બંધારણની કલમ ૧૪ અને કલમ ૧૫નું સીધું ઉલ્લંઘન છે
નવી દિલ્હી, તા.૨: ભારતીય ન્યાયતંત્રમાં મહિલાઓના સમાન અધિકારોની દિશામાં એક મોટું પગલું ભરતા, સુપ્રીમ કોર્ટે સ્પષ્ટ કર્યું છે કે અનુકંપાના આધારે નિમણૂક માટે ‘પરિવાર'ની વ્યાખ્યામાંથી પરિણીત પુત્રીઓને બાકાત રાખવી ગેરબંધારણીય છે. સુપ્રીમ કોર્ટની જસ્ટિસ પી.એસ. નરસિમ્હા અને જાસ્ટિસ આલોક આરાધેની ખંડપીઠે અલ્લાહાબાદ હાઈકોર્ટના અગાઉના અનેક ચુકાદાઓને રદ કર્યા છે.
આ કેસ 'કુલસુમ નિશા વિરુદ્ધ ઉત્તર પ્રદેશ સરકાર'નો છે. કુલસુમ નિશા એક પરિણીત પુત્રી હતી જેણે પોતાની માતાના નિધન બાદ તેમની જગ્યાએ સસ્તા અનાજની દુકાનના લાયસન્સ માટે અરજી કરી હતી. તેને એ કારણસર નકારી કાઢવામાં આવી હતી કે તે પરિણીત છે, અને ૨૦૧૯ના સરકારી આદેશ (GO) મુજબ 'પરિવાર'ની વ્યાખ્યામાં પરિણીત પુત્રીઓનો સમાવેશ થતો નથી.
કોર્ટે બોમ્બે હાઈકોર્ટના 'રંજના મુરલીધર' કેસના ચુકાદાને યોગ્ય ઠેરવતા કહ્યું કે, વૈવાહિક દરજ્જો એ કલ્યાણકારી પગલાંથી વંચિત રાખવાનું કાયદેસરનું કારણ હોઈ શકે નહીં.
કોર્ટે સ્પષ્ટ કર્યું કે પરિણીત પુત્રીઓને નિમણૂકથી વંચિત રાખવી એ ભારતનું બંધારણની કલમ ૧૪ અને કલમ ૧૫નું સીધું ઉલ્લંઘન છે.
સુપ્રીમ કોર્ટે અવલોકન કર્યું કે અરજદાર લગ્ન પછી પણ પોતાની માતા સાથે રહેતી હતી અને દુકાન ચલાવવામાં મદદ કરતી હતી. માતાના નિધન બાદ તેણે પોતાની વિકલાંગ બહેનની પણ જવાબદારી ઉપાડી હતી. આમ, માત્ર 'પરિણીત' હોવાને કારણે અરજી ફગાવી દેવી એ બંધારણીય રીતે ખોટું છે.
સુપ્રીમ કોર્ટે અગાઉની નકારાત્મક ઓર્ડરને બાજુ પર રાખીને સક્ષમ અધિકારીઓને ચાર અઠવાડિયાની અંદર કુલસુમ નિશાને લાયસન્સ આપવાનો આદેશ કર્યો છે. આ ચુકાદો માત્ર એક કેસ પૂરતો મર્યાદિત નથી, પરંતુ તે દેશના તમામ સરકારી વિભાગો માટે એક મજબૂત દાખલો બનશે, જ્યાં પરિણીત દીકરીઓને આ કારણોસર અનુકંપાના લાભથી વંચિત રાખવામાં આવતી હતી.
(3:24 PM IST)
છેલ્લા 8 દિવસમાં સૌથી લોકપ્રિય 
