મુંબઈ,તા.૯: મુંબઈના કુર્લા વિસ્‍તારમાં એક અત્‍યંત દુઃખદ ઘટના બની છે. અહીંના નહેરુ નગરના શમીમ ટાવરમાં રહેતા ૧૨ વર્ષીય મોહમ્‍મદ ઝૈન ઝમીર ઉર્ફે ઝમીર શેખનું લિફટ શાફટમાં પડી જવાથી મોત થયું. સોમવારે રાત્રે જ્‍યારે તે ૧૦મા માળે મિત્રો સાથે રમી રહ્યો હતો ત્‍યારે આ અકસ્‍માત થયો હતો. આ ઘટના બાદ, નહેરુ નગર પોલીસે અકસ્‍માત મૃત્‍યુ અહેવાલ (ADR) નોંધીને તપાસ શરૂ કરી છે. પોલીસ એ પણ તપાસ કરી રહી છે કે લિફટની જાળવણી કે સંચાલનમાં કોઈ બેદરકારી હતી કે નહીં.

પ્રાથમિક તપાસ અને પ્રત્‍યક્ષદર્શીઓના જણાવ્‍યા અનુસાર, મોહમ્‍મદ ઝૈન ઝમીર સોમવારે રાત્રે ૯ વાગ્‍યાની આસપાસ શમીમ ટાવરના ૧૦મા માળે એક મિત્ર સાથે રમી રહ્યો હતો. તે લિફટના બહારના દરવાજા પર હાથ રાખીને ઉભો હતો. એવું કહેવાય છે કે લિફટ હજી ૧૦ માં માળે પહોંચી ન હતી છતાં બહારનો સેફટી ડોર ખૂલી ગયો હતો. દરવાજો ખુલતાની સાથે જ તેણે પોતાનું સંતુલન ગુમાવ્‍યું અને સીધો લિફટ ડક્‍ટ અથવા શાફટમાં પડી ગયો.

અહેવાલ મુજબ અકસ્‍માત સમયે લિફટ ત્રીજા માળે હતી. પરિણામે, ઝમીર ૧૦મા માળેથી પડી ગયો અને સીધો લિફટની છત સાથે અથડાયો. એવું કહેવાય છે કે ટક્કર થતાં જ તે વિદ્યુતસ્ત્રેતના સંપર્કમાં આવ્‍યો, જેના કારણે જોરદાર, વિસ્‍ફોટ થયો હોય એવો અવાજ આવ્‍યો. અવાજથી સતર્ક થઈને, રહેવાસીઓ તેમના ઘરોમાંથી બહાર દોડી આવ્‍યા. સ્‍થળ પર પહોંચ્‍યા પછી, તેઓએ લિફટમાંથી ધુમાડો નીકળતો જોયો અને છોકરાને ગંભીર રીતે ઘાયલ જોયો.

સ્‍થાનિક લોકોએ તાત્‍કાલિક ઝમીરને લિફટમાંથી બહાર કાઢ્‍યો અને ગંભીર હાલતમાં સાયન હોસ્‍પિટલમાં લઈ ગયા. જોકે, ૧૦મા માળેથી પડી જવાથી થયેલી ગંભીર ઇજાઓને કારણે, કોઈપણ તબીબી સારવાર શરૂ થાય તે પહેલાં જ ડોક્‍ટરોએ તેને મૃત જાહેર કર્યો. આ ઘટનાથી વિસ્‍તારમાં ગભરાટ ફેલાઈ ગયો છે, અને હાઉસિગ સોસાયટીમાં હવે લિફટની સલામતી અને જાળવણી અંગે પ્રશ્નો ઉભા થઈ રહ્યા છે.

સમગ્ર ઘટના બિલ્‍ડિંગમાં લગાવેલા સીસીટીવી કેમેરામાં કેદ થઈ ગઈ છે. તપાસના ભાગ રૂપે, પોલીસ ફૂટેજની સમીક્ષા કરી રહી છે. નહેરુ નગર પોલીસે આ મામલે અકસ્‍માત મૃત્‍યુ અહેવાલ (ADR) નોંધીને તપાસ શરૂ કરી છે. પોલીસનું કહેવું છે કે તેઓ લિફટના જાળવણી કે સંચાલનમાં કોઈ બેદરકારી હતી કે કેમ તેની પણ તપાસ કરી રહ્યા છે. જો તપાસ દરમિયાન કોઈ ભૂલ કે બેદરકારી સામે આવશે તો સંબંધિત વ્‍યક્‍તિઓ સામે કાયદેસરની કાર્યવાહી કરવામાં આવશે.