બેંગલુરુ, તા.૨૮: સોશિયલ મીડિયા પર ઝડપી કમાણી અને ઓનલાઈન ટ્રેડિંગની આકર્ષક જાહેરાતો પાછળ છુપાયેલા સાયબર ક્રાઈમના રાક્ષસનો વધુ એક આઈટી નિષ્ણાત શિકાર બન્યો છે. બેંગલુરુના પૂર્વ વિસ્તાર વારાણસી ખાતે રહેતા ૪૭ વર્ષીય ટેક પ્રોફેશનલે ફેસબુક પર આવેલી એક જાહેરાતના ચક્કરમાં પડીને રૂ. ૧.૯ કરોડ જેટલી તબલક રકમ ગુમાવી દીધી છે. પોલીસ તપાસમાં સામે આવ્યું છે કે પીડિતને રોકાણ કરાવવા માટે ઉપયોગમાં લેવાયેલું સમગ્ર ટ્રેડિંગ પ્લેટફોર્મ સંપૂર્ણપણે બોગસ અને નકલી હતું.

ઘટનાની વિગતો અનુસાર, પીડિત સિદ્ધાર્થ (નામ બદલેલ છે) ફેબ્રુઆરી મહિનામાં ફેસબુક સ્ક્રૂઅલ કરી રહ્યા હતા ત્યારે તેમણે એક ઓનલાઈન ટ્રેડિંગની જાહેરાત જોઈ હતી. જાહેરાત પર ક્લિક કર્યાના ટૂંક જ સમયમાં પોતાને નાણાકીય સલાહકાર અને એકાઉન્ટ મેનેજર ગણાવતા 'રાજા એસ' સહિતના બે વ્યક્તિઓએ તેમનો સંપર્ક કર્યો હતો. તેમણે સિદ્ધાર્થને કોમોરોસના 'મ્વાલી આઈલેન્ડ'માં નોંધાયેલી 'Proxtrend Ltd' નામની વિદેશી કંપનીના પ્લેટફોર્મ પર ખાતું ખોલાવી રોકાણ કરવા માટે મનાવી લીધા હતા.

શરૂઆતમાં ફેબ્રુઆરીથી સપ્ટેમ્બર મહિના વચ્ચે સિદ્ધાર્થે થોડા થોડા કરીને મોટી રકમ ટ્રાન્સફર કરી હતી. પ્લેટફોર્મ પર રોકાણ અને તેનો નફો વધતો દેખાતો હોવાથી તેમને વિશ્વાસ બેસી ગયો હતો. પરંતુ, ૯ સપ્ટેમ્બરે જ્યારે તેમણે પોતાની તમામ રકમ ઉપાડવા (Withdrawal) માટે વિનંતી મૂકી, ત્યારે સાયબર ઠગોએ તેમનો અસલી ચહેરો બતાવ્યો હતો. નાણાં ટ્રાન્સફર કરવાના બદલે તેમને વધુ ટ્રેડિંગ કરવા માટે દબાણ કરવામાં આવ્યું હતું.

જ્યારે પીડિતે પોતાના પૈસા પાછા મેળવવા માટે સતત વિનંતી કરી, ત્યારે ઠગ ટોળકીએ આ પ્રક્રિયા મુશ્કેલ હોવાનું બહાનું બતાવીને અટવાયેલી રકમ છોડાવવા માટે વધુ રૂ. ૫૦ લાખ અને રૂ. ૨૦ લાખ જમા કરાવવા માટે દબાણ શરૂ કર્યું હતું. પોતાની સાથે બહુ મોટી છેતરપિંડી થઈ હોવાનો અહેસાસ થતાં જ તેમણે સાયબર હેલ્પલાઈન ૧૯૩૦ પર સંપર્ક કરી ફરિયાદ નોંધાવી હતી. ઈસ્ટ સાયબર ક્રાઈમ પોલીસે ગુનો નોંધીને વિવિધ ખાતાઓમાં ટ્રાન્સફર થયેલી રકમને ફ્રીઝ કરવાના અને આરોપીઓને શોધી કાઢવાના ચક્ર ગતિમાન કર્યા છે.