​નવી દિલ્હી: ક્લાયમેટ એક્ટિવિસ્ટ અને જાણીતા શિક્ષણવિદ સોનમ વાંગચુકને દિલ્હી પોલીસે જંતર-મંતર ખાતેથી હોસ્પિટલમાં ખસેડ્યા બાદ વિવાદ વકર્યો છે. નીટ (NEET) પરીક્ષામાં કથિત ગેરરીતિઓ અને વિદ્યાર્થીઓના મોત મુદ્દે ૨૮ જૂનથી અનિશ્ચિતકાલીન ભૂખ હડતાળ પર ઉતરેલા વાંગચુકને ૨૧મા દિવસે દિલ્હીની સફદરજંગ હોસ્પિટલમાં દાખલ કરવામાં આવ્યા છે. આ ઘટનાક્રમ બાદ તેમના પત્ની ગીતાંજલિ જે. એંગ્મોએ હોસ્પિટલ તંત્ર અને વહીવટીતંત્રની કાર્યશૈલી પર ગંભીર સવાલો ઉઠાવ્યા છે.

​મેડિકલ રિપોર્ટ્સ આપવામાં હોસ્પિટલની આનાકાની

ગીતાંજલિ એંગ્મોએ આક્ષેપ કર્યો છે કે હોસ્પિટલ તંત્ર તેમને વાંગચુકના મેડિકલ રિપોર્ટ્સ આપવાનો ઇનકાર કરી રહ્યું છે. તેમણે જણાવ્યું હતું કે, "ગઈકાલે ડોક્ટરોએ તપાસ કરી ત્યારે તમામ રિપોર્ટ્સ સામાન્ય હતા, પરંતુ આજે અચાનક તેઓ પોટેશિયમ લેવલ ઘટી ગયું હોવાનું જણાવી તેને 'જીવલેણ' ગણાવી રહ્યા છે. અમે રિપોર્ટ માંગીએ છીએ, પરંતુ તેઓ રિપોર્ટ બતાવવા છતાં તેની નકલ આપતા નથી. આ પ્રકારના પારદર્શિતાના અભાવે અમને હોસ્પિટલ પર વિશ્વાસ રહ્યો નથી." પરિવારે સ્પષ્ટતા કરી છે કે જ્યાં સુધી તેઓ બહારની કોઈ લેબમાં રિપોર્ટ્સની પુષ્ટિ નહીં કરી લે, ત્યાં સુધી કોઈપણ પ્રકારની દવાની સારવાર શરૂ કરવા દેવામાં આવશે નહીં.

​૨૦ જુલાઈની સંસદ કૂચ અટકશે નહીં

સોનમ વાંગચુકની હોસ્પિટલમાં દાખલ કરવાની કાર્યવાહીને ગીતાંજલિએ આંદોલનને દબાવવાનો પ્રયાસ ગણાવ્યો છે. તેમણે મક્કમતાપૂર્વક કહ્યું કે, "સોનમ વાંગચુકને અહીં બળજબરીથી લાવવાથી આંદોલન અટકી જશે નહીં. જો સોનમ પોતે ૨૦ જુલાઈના રોજ સંસદ સુધીની કૂચમાં શારીરિક રીતે જોડાઈ શકશે નહીં, તો તેમના પ્રતિનિધિ તરીકે હું પોતે આ કૂચનું નેતૃત્વ કરીશ. આ કાર્યક્રમ નક્કી કરેલા સમયપત્રક મુજબ જ આગળ વધશે."

​દિલ્હી હાઈકોર્ટના આદેશોનો ખોટો અર્થઘટન કરાયાનો આરોપ

ગીતાંજલિએ એમ પણ જણાવ્યું કે દિલ્હી હાઈકોર્ટે માત્ર વાંગચુકના સ્વાસ્થ્ય પર દેખરેખ રાખવા આદેશ આપ્યો હતો, હોસ્પિટલમાં દાખલ કરવાનો કોઈ ફરજિયાત આદેશ નહોતો. પોલીસ દ્વારા તેમને જંતર-મંતરથી ઉઠાવવા બદલ પણ પરિવારે નારાજગી વ્યક્ત કરી છે. હોસ્પિટલમાં પણ પોલીસના ભારે બંદોબસ્તને લઈને તેમણે સવાલ કર્યો હતો કે જો આ માત્ર સ્વાસ્થ્યની તપાસનો મામલો છે, તો પોલીસની આટલી મોટી હાજરી શા માટે છે?

​પરિવારે હોસ્પિટલના સુપરિન્ટેન્ડેન્ટને પત્ર લખીને સૂચના આપી છે કે તેમની અને વાંગચુકના અંગત ડોક્ટરોની લેખિત પરવાનગી વિના કોઈ પણ દવા કે પ્રવાહી આપવામાં ન આવે. હાલમાં સોનમ વાંગચુક હોસ્પિટલમાં ઓબ્ઝર્વેશન હેઠળ છે અને તેમના સમર્થકો તથા પરિવાર તરફથી તેમને જલ્દી અન્ય ટ્રસ્ટેડ હોસ્પિટલમાં ખસેડવાની તૈયારીઓ પણ કરવામાં આવી રહી છે.