નવી દિલ્હી : ભારતના કડક વલણ અને 'અજાણ્યા બંદૂકધારીઓ'ના વધતા ખૌફ વચ્ચે વૈશ્વિક આતંકવાદીઓ હાફિઝ સઈદ અને મસૂદ અઝહરના મોતનો ડર સામે આવ્યો છે. ગુપ્તચર સૂત્રોના જણાવ્યા અનુસાર, મુંબઈ હુમલાનો માસ્ટરમાઇન્ડ હાફિઝ સઈદ અને જૈશ-એ-મોહમ્મદનો વડા મસૂદ અઝહર પાકિસ્તાનમાં પોતાના અગાઉના અડ્ડાઓ છોડીને આઈએસઆઈ (ISI) દ્વારા સંચાલિત અત્યંત સુરક્ષિત સેફ હાઉસમાં ભૂગર્ભમાં ઉતરી ગયા છે.

મૂળ માહિતી મુજબ, લશ્કર-એ-તૈયબાનો કમાન્ડર હાફિઝ સઈદ લાહોરના જોહર ટાઉનથી ખસીને સીધો રાવલપિંડીમાં પાકિસ્તાન આર્મી હેડક્વાર્ટર નજીક ગેરીસન ગ્રાઉન્ડ વિસ્તારમાં આશરો લઈ રહ્યો છે. બીજી તરફ, જૈશ વડા મસૂદ અઝહર પણ સિંધ પ્રાંતના નવાબશાહમાં ગુપ્ત આશ્રયસ્થાને છુપાયેલો છે. 'ઓપરેશન સિંદૂર'માં આતંકવાદી માળખાના મોટા પાયે વિનાશ બાદ આ બંને મોસ્ટ વોન્ટેડ આતંકવાદીઓ ભારત તરફથી નવા હુમલાઓ અને ટાર્ગેટેડ એલિમિનેશનના ડરથી થરથર કાંપી રહ્યા છે.

જીવ બચાવવા માટે આ બંને આતંકવાદીઓએ પોતાના સંગઠનોના નીચલા સ્તરના સભ્યો સાથે સીધો સંપર્ક સંપૂર્ણપણે તોડી નાખ્યો છે. હાફિઝ સઈદ હવે રૂબરૂ મળવાના બદલે માત્ર ઓડિયો સંદેશાઓ દ્વારા જ વાતચીત કરે છે, જ્યારે બહાવલપુરમાં જૈશનું મુખ્ય મથક 'મરકઝ' ધ્વસ્ત થઈ જવાથી સંગઠન ફરી સંગઠિત થવા સંઘર્ષ કરી રહ્યું છે. પાકિસ્તાન સરકાર ભલે સઈદ કોટ લખપત જેલમાં સજા ભોગવતો હોવાનો દાવો કરતી હોય, પરંતુ ગુપ્તચર એજન્સીઓ તેને ખુલ્લેઆમ બનાવટી અને રક્ષણાત્મક નાટક ગણાવી રહી છે.

સંયુક્ત રાષ્ટ્ર દ્વારા વૈશ્વિક આતંકવાદી જાહેર કરાયેલા આ ખુંખાર ગુનેગારોની સુરક્ષામાં પાકિસ્તાન સૈન્ય એજન્સીઓ સીધી રીતે સામેલ છે, જે પાકિસ્તાનના આતંકવાદી સમર્થનનો પર્દાફાશ કરે છે. ભારતના કડક સુરક્ષાદળ અને આંતરરાષ્ટ્રીય દબાણને કારણે આગામી સમયમાં આ આતંકવાદીઓ પર કાયદાકીય ગાળિયો વધુ મજબૂત બનશે તેવી પૂરી સંભાવના છે.