તેહરાન : મધ્ય પૂર્વ (મિડલ ઈસ્ટ) માં સ્થિતિ અત્યંત ગંભીર અને સ્ફોટક બની ગઈ છે. ઈરાનની લશ્કરી ક્ષમતાઓને સંપૂર્ણપણે તોડી પાડવા માટે અમેરિકાએ આજે ઈરાન પર મોટા પાયે હવાઈ હુમલાઓનો નવો રાઉન્ડ શરૂ કર્યો છે. યુએસ સૈન્યના સેન્ટ્રલ કમાન્ડ (CENTCOM) એ સત્તાવાર નિવેદન જાહેર કરીને જણાવ્યું છે કે, હોર્મુઝ સ્ટ્રેટમાં આંતરરાષ્ટ્રીય વાણિજ્યિક જહાજો પર હુમલો કરવા માટે ઈરાની દળો જે સૈન્ય શક્તિનો ઉપયોગ કરી રહ્યા છે, તેને નબળી પાડવા માટે આ ઓપરેશન હાથ ધરવામાં આવ્યું છે. બીજી તરફ, ઈરાનના સરકારી મીડિયાના અહેવાલો અનુસાર, અમેરિકી મિસાઈલો ઈરાનના દક્ષિણ બંદર શહેર બુશેહર પર ત્રાટકી છે, જે દેશનું એકમાત્ર નાગરિક પરમાણુ પાવર પ્લાન્ટ સંકુલ ધરાવતું અત્યંત સંવેદનશીલ ક્ષેત્ર છે.

અમેરિકાના આ આક્રમણના જવાબમાં ઈરાને પણ પલટવાર કરીને યુદ્ધની જ્વાળાને વધુ ભડકાવી દીધી છે. ઈરાનના શક્તિશાળી સૈન્ય સંગઠન 'ઇસ્લામિક રિવોલ્યુશનરી ગાર્ડ્સ કોર્પ્સ' (IRGC) એ જાહેરાત કરી છે કે તેમણે બહેરીન અને જોર્ડનમાં આવેલા અમેરિકી સૈન્ય મથકોને નિશાન બનાવીને ભયાનક વળતા હુમલા કર્યા છે. ઈરાની દળોએ અમેરિકાના લશ્કરી માળખા, ફાઈટર જેટના આશ્રયસ્થાન (એરક્રાફ્ટ હેંગર્સ), મુખ્ય કમાન્ડ સેન્ટરો અને વ્યૂહાત્મક ડ્રોન સિસ્ટમ્સ પર જોરદાર બોમ્બમારો કર્યો હોવાનો દાવો કર્યો છે.

IRGC ની એરોસ્પેસ ફોર્સે જણાવ્યું છે કે, જોર્ડનમાં આવેલા 'અલ-અઝરાક' અમેરિકન લશ્કરી મથક પર મિસાઈલો છોડવામાં આવી છે, કારણ કે ઈરાન પર હુમલો કરનારા મોટાભાગના અમેરિકી વિમાનોએ જોર્ડનના આ જ બેઝ પરથી ઉડાન ભરી હતી. આ ઉપરાંત, એક અલગ સૈન્ય કાર્યવાહીમાં ઈરાની નૌકાદળે બહેરીનમાં તૈનાત યુએસ ફિફ્થ ફ્લીટ (US Fifth Fleet) ના મુખ્યાલય પર હુમલો કર્યો છે. જેમાં અમેરિકાના NSI મેનેજમેન્ટ સેન્ટર, હથિયારો અને લશ્કરી સાધનોના વિશાળ વેરહાઉસ, કમાન્ડ એન્ડ કંટ્રોલ સેન્ટર અને ઇંધણ સંગ્રહ ડેપોને ભારે નુકસાન પહોંચાડ્યું હોવાનો દાવો કરાયો છે. ઈરાનનું કહેવું છે કે અમેરિકા હિંદ મહાસાગરમાં દાદાગીરી કરીને હોર્મુઝ સ્ટ્રેટના દરિયાઈ માર્ગોને અવરોધવાનો પ્રયાસ કરી રહ્યું છે, જે સહન કરવામાં નહીં આવે.

બે મહાસત્તાઓ વચ્ચે સીધા સૈન્ય સંઘર્ષને કારણે વૈશ્વિક સ્તરે ચિંતાનું મોજું ફરી વળ્યું છે. હોર્મુઝ સ્ટ્રેટ એ વિશ્વના ક્રૂડ ઓઇલ સપ્લાય માટેનો સૌથી મહત્વપૂર્ણ માર્ગ છે, અને જો અહીં યુદ્ધ લાંબુ ચાલશે તો વૈશ્વિક અર્થતંત્ર અને તેલના ભાવો પર તેની વિનાશક અસર પડી શકે છે. સંયુક્ત રાષ્ટ્ર (UN) અને વૈશ્વિક નેતાઓ આ તણાવને રોકવા માટે અપીલ કરી રહ્યા છે, પરંતુ બંને દેશો જે રીતે સામસામે આવી ગયા છે તે જોતા આગામી કલાકો સમગ્ર વિશ્વ માટે અત્યંત નાજુક સાબિત થશે.