નવી દિલ્હી — તા.03 કાળા સમુદ્રમાં આવેલા યુક્રેનના ઓડેસા બંદર નજીક એક કાર્ગો જહાજ પર થયેલા ભીષણ ડ્રોન હુમલા બાદ રહસ્યમય સંજોગોમાં ગુમ થયેલા ભારતીય નાવિકની શોધખોળ માટે હવે દેશની સર્વોચ્ચ અદાલતે કડક રૂખ અપનાવ્યો છે. સુપ્રીમ કોર્ટે સોમવારે કેન્દ્ર સરકારના વિદેશ મંત્રાલયને તાત્કાલિક રાજદ્વારી ચેનલોનો ઉપયોગ કરીને ગુમ થયેલા યુવાનની ભાળ મેળવવા માટે સખત નિર્દેશ આપ્યો છે.
મુખ્ય ન્યાયાધીશ સૂર્યકાંત તેમજ ન્યાયાધીશ જોયમલ્યા બાગચી અને વી. મોહનાની બનેલી વિશેષ બેન્ચે સોલિસિટર જનરલ તુષાર મહેતાને આ મામલે તાત્કાલિક પગલાં ભરવા કહ્યું છે. અદાલતે એસજીને યુક્રેન અને રોમાનિયામાં આવેલા ભારતીય દૂતાવાસો પાસેથી જરૂરી સૂચનાઓ મેળવવા અને હુમલાગ્રસ્ત વેપારી જહાજ 'MV AGN રાગનાર' પર સવાર દીપક કુમાર ગુપ્તાના વર્તમાન ઠેકાણા વિશે સઘન પૂછપરછ કરવા આદેશ કર્યો છે. આ મહત્વના કેસની આગામી સુનાવણી હવે આગામી શુક્રવારે હાથ ધરવામાં આવશે.
ઉત્તર પ્રદેશના બરેલી જિલ્લાના ભરતૌલ ગામના મૂળ રહેવાસી અને ૨૨ વર્ષીય દીપક કુમાર ગુપ્તાના મોટા ભાઈ સંદીપ કુમાર ગુપ્તા દ્વારા આ મામલે સુપ્રીમ કોર્ટમાં હેબિયસ કોર્પસ અથવા બચાવ અરજી દાખલ કરવામાં આવી હતી. અરજીમાં એ વાત પર ભાર મૂકવામાં આવ્યો હતો કે ગત ૨૫ જુલાઈએ જહાજ પર હુમલો થયા બાદ પરિવારે ૨૬ થી ૩૦ જુલાઈ દરમિયાન વિદેશ મંત્રાલય તેમજ સંબંધિત દેશોના ભારતીય દૂતાવાસોને અનેક લેખિત રજૂઆતો કરી હતી, પરંતુ સરકારી સ્તરેથી કોઈ જ સંતોષકારક પ્રતિભાવ કે સકારાત્મક ખાતરી મળી ન હતી.
પ્રાપ્ત માહિતી અનુસાર, દીપક ગુપ્તાનો પરિવાર મૂળ બિહારના સિવાન જિલ્લાનો વતની છે, પરંતુ હાલ તેઓ બરેલીમાં સ્થાયી થયા છે. ગત મહિને યુક્રેનના ઓડેસા બંદર પાસે ભારતીય ક્રૂ સભ્યોને લઈને જઈ રહેલા કાર્ગો જહાજ પર અચાનક ડ્રોન ત્રાટક્યું હતું, જેના કારણે મોટું નુકસાન થયું હતું અને આ હુમલા બાદથી દીપક ગુપ્તા ગુમ છે. પરિવારની વિનંતી બાદ હવે સુપ્રીમ કોર્ટની દરમિયાનગીરીથી દીપકને સહીસલામત શોધી કાઢવાની આશા ફરી એકવાર ઉજળી બની છે.