ટેક્સાસ, તા.૨૨: અમેરિકાના ટેક્સાસ રાજ્યમાં આવેલ ભવ્ય શ્રી અષ્ટલક્ષ્મી મંદિરની ૯૦ ફૂટ ઊંચી ભગવાન હનુમાનની પ્રતિમા (જે 'સ્ટેચ્યુ ઓફ યુનિયન' તરીકે જાણીતી છે) ને લઈને એક મોટો વિવાદ ફાટી નીકળ્યો છે. આ વિવાદ ત્યારે વકર્યો જ્યારે રૂઢિચુસ્ત યુટ્યુબર જેસી હ્યુજીસે મંદિરની તસવીર સોશિયલ મીડિયા પર શેર કરી અને ઉશ્કેરણીજનક નિવેદન આપ્યું કે, "જોકે, જ્યારે અમે જીતીશું, ત્યારે અમે આને તોડી પાડીશું." હ્યુજીસની આ ધાર્મિક કટ્ટરતા અને નફરતભરી પોસ્ટ સામે હિન્દુ સમુદાયમાં ભારે રોષ ફેલાયો છે. આ મામલે યુએસ આર્મીના કોમ્બેટ વેટરન (યુદ્ધમાં સેવા આપી ચૂકેલા સૈનિક) અને હિન્દુ અમેરિકન રુચિર બક્ષીએ સામે આવીને જેસી હ્યુજીસની ટિપ્પણીનો અત્યંત આક્રમક અને સચોટ જવાબ આપ્યો છે.

રુચિર બક્ષીએ સોશિયલ મીડિયા પર પોતાનો અવાજ બુલંદ કરતા લખ્યું કે તેમણે કે અફઘાનિસ્તાન અને ઇરાકના યુદ્ધ ક્ષેત્રોમાં ખભે હથિયાર મૂકીને લડેલા સૈનિકોએ એટલા માટે બલિદાન નથી આપ્યું કે કોઈ ત્રીજા દરજ્જાનો ટોક-શો હોસ્ટ કે કટ્ટરવાદી આવીને તેમના ધર્મ અને પૂજાસ્થળો પર પ્રહાર કરવાની ધમકી આપે. બક્ષીએ પોતાની લશ્કરી સેવાને યાદ કરતા જણાવ્યું કે તેમણે સેનામાં ખ્રિસ્તી, મુસ્લિમ, યહૂદી અને નાસ્તિક સાથીદારો સાથે મળીને દેશની રક્ષા કરી છે અને યુદ્ધના મેદાનમાં કોઈ ઈશ્વર કે ધર્મ નહીં પરંતુ માત્ર દેશ અને ફરજ સર્વોપરી હોય છે. તેમણે સ્પષ્ટ શબ્દોમાં કહ્યું કે, "અમેરિકા એ તમારું કોઈ ધાર્મિક શાસન (થિયોક્રસી) નથી. જ્યારે તમે નક્કી કરો કે તમે જીતી ગયા છો, ત્યારે હિન્દુઓ માટે ધાર્મિક સ્વતંત્રતા સમાપ્ત થઈ જતી નથી."

અમેરિકામાં હિન્દુ સમુદાયનું યોગદાન અને 'કોહના' (CoHNA) નું સમર્થન

બક્ષીએ વધુમાં જણાવ્યું હતું કે જે મંદિરોમાં લોકો પૂજા કરે છે તે જ સમુદાયના લોકો અમેરિકામાં કરવેરો ભરે છે, મોટા વ્યવસાયો ચલાવે છે અને પોતાના સંતાનોને યુએસ આર્મીમાં દેશસેવા માટે મોકલે છે. અન્ય કોઈ સમુદાયના પૂજાસ્થળને નષ્ટ કરવાની કલ્પના કરવી કે તેને રાજકીય વિજય ગણવો એ દેશભક્તિ નથી પરંતુ સામાજિક કટ્ટરતા છે. તેમણે ભારપૂર્વક કહ્યું કે, "તમને કંઈપણ તોડી પાડવાનો કોઈ અધિકાર નથી. કાયદેસર રીતે નહીં, નૈતિક રીતે પણ નહીં."

બક્ષીના આ બહાદુર અને બેધડક નિવેદન બાદ સોશિયલ મીડિયા પર ભારે ચર્ચા શરૂ થઈ છે, જ્યાં કેટલાક લોકોએ તેમની નાગરિકતા અને સેનાની ભૂમિકા પર સવાલો ઉઠાવ્યા, તો બીજી તરફ 'ધ કોએલિશન ઓફ હિન્દુઝ ઓફ નોર્થ અમેરિકા' (CoHNA) સહિત અનેક સંગઠનોએ રુચિર બક્ષીના સમર્થનમાં ખુલીને મેદાનમાં આવીને તેમની રાષ્ટ્રભક્તિ અને સાહસને બિરદાવ્યું છે.