ઈસ્લામાબાદ: મધ્ય પૂર્વમાં વધી રહેલા ભૌગોલિક-રાજકીય તણાવની અત્યંત માઠી અસર પાકિસ્તાન પર જોવા મળી રહી છે. પાકિસ્તાન હાલ તેના ઈતિહાસના સૌથી ગંભીર ઊર્જા સંકટમાં ફસાયું છે. દેશ પાસે હવે માત્ર 5 થી 7 દિવસ ચાલે તેટલો જ ઓઈલનો સ્ટોક બચ્યો હોવાથી જનતામાં ભારે ફફડાટ અને આક્રોશ જોવા મળી રહ્યો છે.
પેટ્રોલના ભાવમાં વિક્રમી વધારો
પાકિસ્તાન સરકારે ઈંધણના ભાવમાં એકાએક 42.7 ટકાનો તોતિંગ વધારો ઝીંકી દીધો છે. અગાઉ પ્રતિ લિટર PKR 321.17 ના ભાવે મળતું પેટ્રોલ હવે PKR 458.41 ની ઐતિહાસિક સપાટીએ પહોંચી ગયું છે. પેટ્રોલિયમ મંત્રી અલી પરવેઝ મલિકે સ્વીકાર્યું છે કે સરકાર પાસે આ સંકટ સામે લડવા માટે કોઈ આકસ્મિક યોજના નથી. જોકે, સરકારે ડીઝલ પરના ટેક્સ શૂન્ય કરીને તેનો સંપૂર્ણ બોજ પેટ્રોલ પર નાખવાનો નિર્ણય કર્યો છે.
ભારતની વ્યૂહાત્મક તૈયારીઓની પ્રશંસા
પાકિસ્તાની મંત્રીઓએ જાહેરમાં સ્વીકાર્યું છે કે ભારત જેવી આકસ્મિક તૈયારીઓના અભાવે આજે પાકિસ્તાન ઘૂંટણિયે પડી ગયું છે. ભારત પાસે સ્ટ્રેટેજિક ઓઇલ રિઝર્વની અત્યંત મજબૂત વ્યવસ્થા છે, જ્યારે પાકિસ્તાન પાસે માત્ર કોમર્શિયલ સ્ટોક જ ઉપલબ્ધ છે. વૈશ્વિક બજારમાં ક્રૂડ ઓઈલની કિંમત પ્રતિ બેરલ $126 સુધી પહોંચી ગઈ હોવા છતાં ભારતની સ્થિતિ સ્થિર છે.
ભારત અને પાકિસ્તાન વચ્ચેનો મોટો તફાવત
જ્યારે પાકિસ્તાન તેલ માટે વલખાં મારી રહ્યું છે, ત્યારે ભારતમાં સ્થિતિ સંપૂર્ણપણે નિયંત્રણમાં છે.
•    ઓઈલ ભંડાર: ભારત પાસે લગભગ 60 દિવસનો વાસ્તવિક ઓઈલ ભંડાર છે, જ્યારે પાકિસ્તાન પાસે માંડ 5-7 દિવસનો સ્ટોક છે.
•    LPG સ્ટોક: ભારત પાસે આશરે 8,00,000 ટન LPG નો જથ્થો ઉપલબ્ધ છે.
•    ભાવમાં સ્થિરતા: ભારતમાં પેટ્રોલ આશરે ₹94.77 અને ડીઝલ ₹87.67 પ્રતિ લિટરની આસપાસ સ્થિર છે.
•    વ્યૂહાત્મક રિઝર્વ: ભારતનો વિશાળ વિદેશી મુદ્રા ભંડાર અને વ્યૂહાત્મક રિઝર્વ તેને વૈશ્વિક કિંમતોના આંચકા સામે રક્ષણ પૂરું પાડે છે.