આંધ્ર પ્રદેશના કુર્નૂલ જિલ્લાના મંત્રાલયમ મંડળ પાસે એક બોલેરો કાર અને લોરી વચ્ચે થયેલા ભયાનક અકસ્માતમાં ૮ લોકોના ઘટનાસ્થળે જ કમકમાટીભર્યા મોત નીપજ્યા છે, જ્યારે ૧૦ થી ૧૨ લોકો ઘાયલ છે.

આંધ્ર પ્રદેશમાં ગુરુવારે વહેલી સવારે એક અત્યંત દુઃખદ માર્ગ અકસ્માત સર્જાયો હતો. કુર્નૂલ જિલ્લાના મંત્રાલયમ મંડળમાં આવેલા ચિલકલાડોના ગામ પાસે તીર્થયાત્રીઓ ભરેલી એક બોલેરો કાર સામેથી આવી રહેલી રેડી-મિક્સ લોરી સાથે ધડાકાભેર અથડાઈ હતી. આ ભયાનક ટક્કરમાં ૮ લોકોએ પોતાના જીવ ગુમાવ્યા છે, જેમાંથી પાંચ લોકોના ઘટનાસ્થળે જ મોત થયા હતા જ્યારે ત્રણ લોકોએ હોસ્પિટલમાં દમ તોડ્યો હતો. અકસ્માતમાં અન્ય ૧૦ થી ૧૨ લોકો ગંભીર રીતે ઘાયલ થયા છે, જેમને તાત્કાલિક સારવાર માટે એમ્મિગાનુરની હોસ્પિટલમાં દાખલ કરવામાં આવ્યા છે. પોલીસના જણાવ્યા અનુસાર, તમામ મૃતકો કર્ણાટકના ચિક્કમગલુરુ વિસ્તારના રહેવાસી હતા અને તેઓ પ્રખ્યાત મંત્રાલયમ મંદિરના દર્શન કરીને પરત ફરી રહ્યા હતા ત્યારે આ ગોઝારો અકસ્માત સર્જાયો હતો. પોલીસે બચાવ કામગીરી હાથ ધરીને વધુ તપાસ શરૂ કરી છે.